Скромно и достоинствено членовите на Меѓуопштинското здружение на слепи и слабовидни лица од Кочани го одбележуваат 15 октомври – Меѓународниот ден на белиот стап, упатувајќи порака до институциите на системот да посветат поголемо внимание за создавање услови за нивно полесно движење во јавниот простор.
Покрај недостигот од соодветни пешачки патеки и звучна сигнализација на пешачките премини, апсурдот е уште поголем со фактот што од пред неколку месеци на Здружението му е одземена единствената просторија за работа што се наоѓа во дотраената дрвена барака до Основниот суд во Кочани.
-Оваа прилика ја користиме да упатиме апел до идниот градоначалник и идниот Совет да обрнат поголемо внимание на нашето здружение и на нас како членови на Здружението и со тоа поактивно да ги поддржат планот и програмата за работа за да ги исполниме сите предвидени активности. Морам да кажам дека од април или мај оваа година просторијата во којашто работеше и беше канцеларија на нашето здружение ни е одземена и сега се соочуваме со недостаток на просторија каде што секретарот и службата фактички би ја извршувале функцијата за водење на документи и слично. Доколку е можно Локалната самоуправа да размисли и да ни додели просторија, истакна Тоше Илиев, претседател на Здружението на слепи и слабовидни лица.
Просторијата што ја користеше Здружението е одземена без никаква причина и му е доделена на Министерството за одбрана, а слепите и слабовидните лица сега своите состаноци ги одржуваат на улица.
– Ја користам оваа прилика да го честитам 15 октомври – Меѓународниот ден на белиот стап кој што е воедно и симбол на слепиот човек којшто 100% слеп или со оштетен вид без белиот стап не може во секојдневниот живот да се да се движи самостојно. Нашето здружение е една од најактивните како член на Сојузот на слепи и слабовидни лица на Македонија. Нашето здружение опфаќа осум општини со околу 130 членови коишто се активни во секојдневните активности и се трудиме што е можно повеќе тие да бидат и зголемени. Ја користам оваа прилика да повикам институциите да обратат повеќе внимание на конвенциите коишто се застапени во Обединетите нации и да ги штитат нашите права, на лицата со попреченост и на слепите лица, истакна Душан Граовац, член на Здружението на слепи и слабовидни.
Со оглед што останале без просторија, прес конференцијата по повод 15 октомври – Денот на белиот стап членовите на Здружението ја одржаа во Паркот на Револуцијата.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
