Во рамките на нејзината официјална посета на Кочани, амбасадорката на Кралството Холандија, Узлем Џанел, ја посети ЈОУ библиотека „Искра“, каде што официјално беше отворено Холандско катче. Катчето е формирано со донација од литературни дела од познати холандски автори преведени на македонски јазик, наменети и за деца и за возрасни.
Кочани е третиот град во Македонија, по Скопје и Кавадарци, во кој Холандската амбасада отвора вакво посебно катче за промоција на холандската книжевност и култура.
-Денес донираме 100 книги. Можеби не звучи многу, но мислам дека е многу добар почеток, особено кога знам дека во вашата библиотека имате речиси 100.000 книги и документи. Библиотеките се многу посебни места — како ќерка на наставник, голем дел од моето време имам поминато во библиотеки и мислам дека тие се навистина место на знаење и буквално носат светлина – „Искра“. По Скопје и Кавадарци, се надевам дека ова ќе биде место каде што луѓето ќе доаѓаат да најдат знаење, но и да научат нешто повеќе за Холандија преку овие книги. Се надевам дека тие не само што ќе отворат прозорец кон Холандија, туку ќе изградат и мост меѓу Холандија и Кочани, рече амбасадорката Џанел.
Директорката на Општинската библиотека „Искра“, Кристина Ѓорѓиевска Атанасова, изрази благодарност за донацијата и истакна дека ова катче има големо значење за збогатување на библиотечниот фонд и за зближување на локалните читатели со холандската литература.
-Како Библиотека ни претставува особена чест и задоволство што денешната официјална посета амбасадорката на Холандија ја искористи и за посета на нашата институција. Добивме литературни дела на холандски автори преведени на македонски јазик коишто се веќе изложени во нашата библиотека. Станува збор за дела од познати автори, за возрасни и за деца. Денешната посета за нас претставува збогатување на нашиот библиотечен фонд и еден вид на мост на соработка и културна размена, при што нашите читатели и локалната заедница ќе имаат можност да се запознаат со холандските автори. Благодарност за посетата и за донацијата на книги коишто се од големо значење за нас, рече директорката на „Искра“..
Во рамките на свеченото отворање на катчето, амбасадорката Џанел ѝ врачи на директорката Атанасова официјална меморијална плочка со цел да биде поставена покрај Холандското катче, како траен белег за потеклото на книгите и пријателството меѓу двете средини.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
