Локалната самоуправа на Зрновци објави повик за повторна јавна анкета и јавна презентација за изменување и дополнување на урбанистичкиот план за селото Мородвис, со детална разработка. Преземените активности се во рамки на планскиот период 2024 – 2034 година, согласно насоките од постоечкиот Урбанистички план за Мородвис (2019-2029), а за што согласност даде и Советот на Општина Зрновци.
Измените и дополнувањата се однесуваат на урбанистичките блокови 14, 20, 21 и 22, што се наоѓаат на јужната страна на селото, под основното училиште и домот на културата. Вкупната површина што е предмет на измените во планот изнесува 11,36 хектари, а процентот на изграденост на целата површина е 35,74%.
Планираните намени се во согласност со важечката планска документација од повисоко ниво и со постојната состојба, при што формирани се 80 градежни парцели, од кои 66 се во основната класа на намени А1 – домување во куќи со катност П+2. Исто така, планирана е намена А3.3 – згради за престој на пензионери, стари и немоќни лица, а предвидениот објект е со максимален капацитет од 162 лица.
Останатите парцели се за Б1 – мали единици за комерцијални и деловни дејности, В2 – здравство и социјална заштита, Г2 – лесна преработувачка и помалку загадувачка индустрија и помалку загадувачки постројки за производство на енергија, Д3 – спорт и рекреација на зелени површини, Е1.1 – сообраќајни патни инфраструктури, Е1.6 – канализациски инфраструктури (пречистителна станица), Е1.8 – инфраструктури за пренос на електрична енергија (трафостаница), Е1.12 – инфраструктури за наводнување и Е1.13 – површински соларни и фотоволтаични електрани.
Во планот се зацртани и две јавни паркиралишта во рамки на Блок 14 со по 20 и 22 паркинг места и две во рамки на Блок 21 со по 11 паркинг места кои ќе им служат на посетителите и корисниците на градбите, намените и институциите и се сместени во нивна непосредна близина.
Периодот за јавната анкета, во која со свои забелешки, предлози и мислења можат да учествуваат сите заинтересирани граѓани и правни лица, е до 24 февруари, а анкетен лист може да се преземе од официјалната веб страница на Општина Зрновци.
Јавната презентација на измените и дополнувањата на планот ќе се одржи на 19 февруари во 12 часот во зградата на Локалната самоуправа на Зрновци.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
