Локалната самоуправа на Зрновци ќе обезбеди 1,2 милиони денари за кофинансирање на проект за алтернативно сообраќајно поврзување на населените места во општината, односно на селото Видовиште со селото Мојанци во општина Кочани.
Едногласна одлука за издвојување на потребните средства донесе Советот на Општина Зрновци на 54. седница, при што градоначалникот Борчо Коцев даде подетално образложение за проектот што може да се реализира во блиска иднина.
-На вториот повик од Владата за финансиска поддршка на капитални проекти во локалната самоуправа, Општина Зрновци во март конкурираше со два проекта, за изградба на локалниот пат од местото викано Оризови Гумна до Друмот кај село Видовиште, за којшто жителите најмалку две децении бараат изградба на тој пат. Исто така, овде е и еден алтернативен пристап кон општина Кочани во блиска иднина. Имајќи предвид дека самиот локален пат се протега од излезот на селото Видовиште до реката Брегалница, во должина од 1600 метри и завршува до атарот на селото Мојанци, коешто е под Општина Кочани. Верувам дека ќе се најде можност за соработка и за реализација на проект од страна на Општина Кочани за изградба на мост на Брегалница на тој потег и продолжување на тој локален пат кон селото Мојанци. Финансиската конструкција на тој проект е 7,4 милиони денари, истакна градоначалникот Коцев.
Вториот проект со кој аплицирала Општина Зрновци е за изградба на локален пат од месноста Циганско Маало до месноста Ташлак со должина од 1.400 метри. Финансиската конструкција за него изнесува 11,1 милиони денари.
-Ние ќе ја донесеме одлуката, можеби на електронската аукција ќе таа цена ќе биде падната или ќе остане иста, ова е по насока на Министерството за транспорт и утре веќе ќе ја доставиме таа одлука и да ги потпишеме во вторник или среда договорите со Министерството. До петок можно е и да направиме веќе започнување на постапка за избор на економски оператор за реализација на овие два многу витални и клучни проекти за развојот на општина Зрновци, додаде Коцев.
На 54. седница на Советот, во образложението за реализација на Програмата за изградба и реконструкција на локалните патишта и улици за 2025 година, Коцев ја истакна изградбата на нова локална сообраќајница “Вински пат” меѓу општините Зрновци и Виница во должина од 2,4 километри, со вредност 22 милиони денари. Исто така, беше најавена изградбата на локалните патишта од Видовиште до манастирот Свети Спас и до локалитетите Гробишта и Крстот, со вкупна вредност од околу 7,3 милиони денари, потоа изградба и реконструкција на улици во село Мородвис од околу 4,7 милиони денари, како и реконструкција на регионалниот пат Зрновци – Кочани.
Дополнително, Коцев најави изградба на сервисна улица од локалниот пат Зрновци – Мородвис до обиколницата меѓу овие две села, како и реконструкција на дел од улици во село Зрновци во вредност од 6 милиони денари.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
