Општина Кочани денеска организираше јавна презентација на македонска компанија која увезува и продава еколошки автoбуси на електрична енергија, а што можат да се користат во градскиот и линискиот превоз на патници.
Притоа беше организирано и возење за новинарите по улиците во градот, со објаснување дека се работи за современ автобус, што ги задоволува сите еколошки стандарди за заштита на животната средина. Претставниците од компанијата истакнаа дека со набавката на вакво возило за двојно се намалуваат трошоците за енергенс, односно за над 300 километри, колку што можат да се поминат со едно полнење на батериите на автобусот, ќе се потрошат околу 2.000 денари.
Од Општината рекоа дека целта на презентацијата е да се претстават можностите што ги нудат електричните возила.
-Во напорите за зачувување на здрава животна средина и обезбедување на еколошки јавен превоз имаме можност од прва рака да се убедиме во квалитетите и потенцијалите со кои располага ова превозно средство и да го презентираме и пред граѓаните и пред операторите кои ги даваат услугите во линискиот градски превоз. Секако, Општина Кочани во своите буџетски и стратегиски планирања понатаму ќе бара можност за обезбедување средства, за да дојдеме во состојба да можеме да финансираме едно вакво превозно средство кои ќе биде од интерес за сите граѓани, истакна градоначалникот Љупчо Папазов.
На новинарско прашање колку чини еден еколошки автобус на батерии, претставниците на компанијата увозник рекоа дека во зависност од бројот на патници што можат да се превезат и другите технички карактеристики на возилото, цената се движи меѓу 100 и 400 илјади евра.
Повеќе од јасно е дека Локалната самоуправа на Кочани во својот буџет нема пари за да купи електричен автобус, како што тоа го направија други општини во државата. Нејасно е кому му беше наменета презентацијата на автобусот и дали секоја компанија, што увезува вакви и слични возила, ќе има можност Општината да ѝ организира бесплатна медиумска презентација? Во меѓувреме, депонијата кај Бели повторно се разгоре и продолжува сериозно да ја загадува животната средина. Локалната власт и раководствата се на потег.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
