Во изминатите три години се соочивме со големи предизвици и наследени проблеми, заглавени и нефункционални проекти и неисплатени обврски на претходната локална власт, со период на постковид ситуација, со голема енергетска и економска криза, како и две ипол години на централна власт која немаше слух и еднаков третман за општините, вели градоначалникот на Виница, Миле Петков во освртот за реализираните активности во изминатиот период од неговиот мандат.
-И покрај сѐ, во овие три години во делот на сообраќајната инфраструктура реализирани се проекти за изградба реконструкција и рехабилитација на 30 улици и локални патишта во Виница и населените места Блатец, Градец. Истибања и Трсино во должина од 12 км, извршено е поплочување на улици и тротоари во Виница и населените места Јакимово и Истибања на површина од пет илјади метри квадратни, а во предтендерска постапка е изградба и реконструкција на уште пет улици во Виница и населените места Јакимово и Црн Камен. Имаме склучено договор и за изградба и реконструкција уште на десетина улици во Виница и населените места Пекљани, Крушево, Блатец Липец, Градец и Лески. Реализирани се и проекти за доградба на филтер станицата за вода во Виница, реконструкција на дел од водоводната мрежа во Блатец, изградба и реконструкција на водоводната мрежа на 9 улици во Виница, изградба на фекална канализација во Липец и на четири улици во Виница, истакна Петков.
Во освртот ги нагласува преземените активности во заштитата на животната средина на територијата на општината.
-Затворена е комуналната депонија кај селото Лески и дивите депонии во Истибања, Блатец и Виничка Кршла, а набавено е специјализирано комунално возило за собирање отпад и машина за метење и одржување на хигиената на јавните површини. Инсталирани се фотоволтаични системи на административната зграда на Општина Виница, со поддршка од новата влада во тендерска постапка се два капитални проекти за регулација на речното корито на Градечка Река во должина од 700 метри, регулација на Виничка Река и партерно уредување на истата во должина од 750 метри, додава Петков.
За детската заштита и образованието во општина Виница досега биле остварени вложувања за отоврање сензорна соба за лицата со интелектуална и телесна попреченост, реконструкција на основните училишта во Виница, Истибања и Липец, на средното училиште и во двата објекти на градинката во Виница и објектите во Истибања и Блатец.
Во развојот на културата и спортот Општината поддржала низа важни манифестации и настани со што се поттикнува дружењето на младите.
-Реконструирани и пуштени во употреба се два капитални проекта од областа на културата и тоа старата Кино сала, која 20 години беше надвор од употреба, и Сината сала во домот на културата „Тошо Арсов“. За поддршка на културата и културни настани беа издвоени над 6 милиони денари, изграден е современ кошаркарски терен и теретана на отворено со над 8 милиони денари, а во делот на поддршката за млади формиран е Локалниот младински совет, нагласи Петков.
Осврнувајќи се на активностите во урбанизмот Петков го потенцираше донесувањето на неколку урбанистички проекти за изградба на капитални проекти и изработката на четири детални урбанистички планови во Виница и четири села, што се во завршна фаза.
-Во завршна фаза на изградба се два капитални проекти и тоа изградба на затворениот градски пазар и изградба на термоизолациона фасада на административната зграда на Општина Виница, а од програмата за прекугранична соработка со Република Бугарија во предтендерска постапка е проектот за уредување на кејот на Градечка Река во урбаниот дел на Виница, во должина од еден километар. После подлг временски период успеавме да обезбедиме донација на две специјализирани противпожарни возила и опрема за пожарникарите, финансиски и логистички е поддржано Доброволното противпожарно друштво, а за поддршка на невладините организации и социјално загрозените семејства одвоивме финансиски средства во износ од над 3 милиони денари, додаде Петков.
Со средства обезбедени од буџетот на Општина Виница, како и со поддршката од Владата тој најави засилено темпо на работење за да се создадат подобри услови за живот и Виница да стане пристојно место за живеење.
-Успеавме да реализираме голем дел од проектите кои беа дел од нашата програма и од потребните на вас, граѓаните на Виница. Верувам дека ги подобривме условите за живот на граѓаните, како во градот, така и во населените места. Затоа пак, наредната година со поддршка на новата централна власт очекувајте рекорден број на проекти во историјата на општина Виница, заклучи градоначалникот Петков.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
