Повеќе од пет години поминаа од иницијативата на жителите од Горни и Долни Подлог и Мојанци за поврзување на нивните населби со градскиот автобуски превоз до Кочани. До администрацијата во Општина Кочани веќе доставиле и две писмени барања, поткрепени со над 500 потписи собрани со петицијата што ја организираа во 2020 година.
Во образложението на иницијативата стои дека со тоа ќе се обезбеди редовен, поевтин и лесно достапен превоз за околу 1.300 жители, колку што според пописот од 2021 година, живеат во трите населени места.
-Не сме рамноправни со другите жители во општината, на пример во Оризари, каде е многу подалеку, а имаат линија во самото село. До кај нас е многу блиску, линијата запира горе, во индустриската зона, треба само да помине на кружниот тек и да се симне во нашите места. Два пати во денот е сосема доволно, за да бидат информирани луѓето и да патуваат со превозот, истакна Ружа Стојмилова, подносителка на иницијативата.
Пред нешто повеќе од еден месец жителите на трите села доставиле ново писмено барање до Општината, а на последната седница на Советот имаше и советничко прашање до администрацијата.
-Неколку години ова барање е константно доставувано и е во фиока. Ве молам на граѓаните од овие села да им биде доставен одговор за ова барање, истакна Душанка Ѓорѓиева Трпевски, член на Советот на Општина Кочани.
Потребата од градски автоубски превоз особено се однесува за повозрасните жители од трите села кои имаат потреба од лекарска и друга помош, а користењето такси превоз до Кочани и назад ги чини околу 500 денари.
-Повеќето се стари, жени останати сами без семејства и децата им се во странство, а немаат доверба со секого да се превезуваат. Дури се изложуваат на голем ризик, поминуваат низ жицата, горе на автопатот, за да поминат и да се качат во автобусот. Не само нивниот живот што го ставаат во опасност, туку и животот на тој што вози по автопатот. Таму се вози брзо, не може веднаш да застане, а ние во поодминати години знаете како се движиме, додаде Стојмилова.
Видливи се оштетувањата на оградната мрежа, која дури е и остранета на местото каде што жителите го поминуваат експресниот пат за да стигнат до постојката на која застанува градскиот автобус во индустриската зона. За среќа, до сега немало посериозни последици, но опасноста останува.
Пред неколку години, кога ја доставиле иницијативата, жителите добиле одговор од општинската администрација дека од финансиски аспект не постојат пречки, односно од буџетот можат да се издвојат средства за субвенциионирање на возниот билет. Сепак, неопходни биле технички усогласувања, односно обезбедување сообраќајна дозвола за превозникот за продолжување на линијата, определување на точните локации за постојките, утврдување на возниот ред и слични детали што требало да се разгледаат со сообраќaјната инспекција и со МВР.
Последниот договор што Општина Кочани го потпишала со давателот на услугата за градскиот превоз е склучен во март минатата година и е со важност од две години. Токму затоа, жителите од трите рамничарски села повторно ја поднеле инцијативата, за да има време целата процедура да се заврши пред локалните избори, со надеж дека новата локална власт ќе го исполни нивното барање.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
