Издавачката куќа „Орион“ од Делчево ја издаде првата детска илустрирана книга „Во светот на палавите епиграмчиња 1“ од авторот Миле Ѓорѓијоски, која освен на кирилица, паралелно е отпечатена и со глаголица нова, чиј креатор е македонскиот графички дизајнер Ласко Џуровски.
На денешната промоција на книгата, што се одржа во општинската библиотека „Искра“ во Кочани, авторот нагласи дека се работи за пионерски почетоци во објавувањето епиграми кај нас, а што како кратка поетско-сатирична форма многу малку е застапена и на балканските простори.
Илустрациите за книгата ги изработи средношколката Софија Ситновска од Македонска Каменица, со која авторот има неколкугодишна соработка за другите негови литературни дела.
-Ова е прва книга со епиграми во Македонија и на Балканот, а со оглед што е прилагодена за детската возраст, во неа има посебен осврт за тоа како децата да ја научат и да ја користат глаголицата, односно да ја инсталираат во компјутерското пишување. Целта беше да научат да се служат со ова некогашно наше, словенско и македонско писмо, затоа што тоа е дел од историјата, писменоста и македонските корени. Секако, не го отфрламе македонското кирилично писмо, но сакаме да ја продолжиме подзаборавената традиција во користењето глаголица, која во Хрватска, Чешка и други словенски држави е нешто свето. Среќен сум што илустрациите повторно ги изработи младата Софија со која соработувам уште кога беше во осмо одделение, а сега веќе е во втора година во средно образование и има свој препознатлив стил во цртањето и според мене е еден од нашите најдобри илустратори. Потврда за тоа е што годинава ја доби првата награда на конкурсот „Пјер“ на весникот „Вечерње новости“ во Србија, истакна Ѓорѓијоски.
Промотор на книгата беше Љубинка Ајтовска, а со свои епиграми и цртежи на промоцијата учествуваа и ученици од основните училишта „Св. Кирил и Методиј“ и „Раде Кратовче“ од Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
