Македонската платформа против сиромаштијата, синоќа, во Скопје ги додели наградите на новинарите, кои по објавениот конкурс, со своите истражувачки стории го понесоа епитетот „Гласник на невидливите“.
Награда за општествено посветен новинар што внимава да не гради стереотипи и не се води од сензационализам доби Тони Ајтовски, за истражувачката сторија „Македонските печалбари во Италија не можат да го остварат своето право на пензија по повеќе од две години“. Сторијата е работена преку платформата Локалактив.мк – медиум на заедницата, во соработка со граѓанскиот активист Зоран Биковски од Здружението „Жена“ од Делчево.
– Задоволен сум што добив награда што поддржува известување кое ги почитува граѓаните и внимава на нивното достоинство. Се работи за маргинализирана група од 150 нашинци кои во периодот на транзицијата работеле во Италија и по исполнувањето на условите за пензионирање се вратиле дома. Сепак и по повеќе од две години од враќaњето не можат да си го остварат законското право да го земаат италијанскиот дел од пензијата што им следува, а причината е несоработката меѓу нашите и институциите во Италија, истакна Ајтовски во своето обраќање пред присутните.
Македонската платформа за борба против сиромаштијата важи за сојузник во градењето на нова медиумска култура што подразбира одговорно известување за состојбите поврзани со сиромаштија и социјална исклученост, но и однесување со достоинство кон лицата кои се наоѓаат во ранлива ситуација.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
