Екопатролата за контрола на депонирањето на отпадот во Кочани конечно треба да профункционира откако на последната седница на Советот на Општината беше донесена одлука за формирање и определување членови кои ќе влезат во нејзиниот состав.
Под официјалниот назив Надзорно тело за вршење мониторинг и давање поддршка при реализација на Програмата за јавна чистота и третман на отпадот на територијата на општина Кочани, формирањето на екопатрола беше едно од барањата што произлегоа од протестот и блокадата на пристапот до комуналната депонија кај Бели.
-Ова надзорно тело го сочинуваат 11 члена, односно седум претставници од редот на граѓанските активисти, двајца претставници од Советот на Општина Кочани, претставник од редот на општинската администрација и претставник од комуналното јавно претпријатие „Водовод“ – Кочани. За членови на надзорното тело се именуваат: од редот на граѓански активисти Стојан Георгиев, Веселин Бошков, Златко Илијев, Ванчо Мишовски, Милчо Величковски, Александар Ѓорѓиев и Лазар Захариев, од редот на Советот на Општината – Жаклина Филипова Свеќароска и Венко Крстевски, претставник од редот на општинската администрација – Даниел Стојанов и претставник од комуналното јавно претпријатие – Мирче Паунов, истакна претседателот на Советот, Лазо Митев во образложението на предлог-одлуката за формирање на екопатролата.
Предлогот беше поддржан со 11 гласа „за“, а одлуката стапува во сила по нејзиното објавување во Службениот гласник на Општина Кочани.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
