Министерството за животна средина вечерва во Кочани организираше јавна расправа за проблемот со депонирањето на отпадот во комуналната депонија кај Бели. Со известување објавено вчера на официјалниот фејсбук профил, Министерството ги повикало граѓаните да присуствуваат на средбата во Салата на Советот на Општина Кочани.
За разлика од јавната дебата што се одржа минатата сабота, овојпат изостана масовноста, па таа повеќе беше средба со три-четворица граѓани и исто толку претставници од Министерството. Ако се изземат претставниците од МВР и од Центарот за социјални работи, кои присуствуваа по службена должност, прашање е како била замислена јавноста на состанокот во просториите на Мултикултурниот центар. Немаше официјален претставник од КЈП „Водовод“, па дури ниту од Општина Кочани, ако не се смета лицето што е задолжено за салата.
Покани за присуство на расправата биле испратени и до претставниците на Надзорното тело за мониторинг и давање поддршка при реализација на Програмата за јавна чистота и третман на отпадот на територијата на општина Кочани, но очигледно беше нивното отсуство.
-Членовите на Надзорното тело се револтирани поради начинот на организирање на расправата и отсуството на јавноста, па решија да не присуствуваат на средбата. Дополнителен аргумент е што никој од Министерството ниту еднаш не се појави на тринеделниот протест и блокадата на крстосницата на патот кон депонијата кај Бели. Истото се повтори и на јавната расправа што се одржа минатата сабота кога, иако најавени, не дојдоа претставници од ресорното министерство, поради што поголем број граѓани револтирано ја напуштија салата. Со тоа што и денешната јавна расправа доживеа неуспех, само се потврдува дека сме биле во право за несоодветниот однос на Министерството кон граѓаните на Кочани, истакна Венко Крстевски, претседател на Надзорното тело за мониторинг и давање поддршка при реализација на Програмата за јавна чистота и третман на отпадот на територијата на општина Кочани.
Се очекува Министерството да објави официјално известување за ставовите и заклучоците што произлегле од вечерашната јавна расправа во Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
