Здружението за екологија и заштита на животната средина „Еко Тим Исток“ беше организатор и домаќин на јавната трибина „Намалување на отпадот со цел заштита на животната средина – примена на законски регулативи за намалување на депонирање на отпадот“ што вечерва се одржа во ЦК „Бели мугри“ во Кочани.
Главната цел на настанот е подобрување на информираноста, транспарентноста и учеството на граѓаните и институциите во справувањето со неопасен отпад. Исто така, намерата е да се зајакне владеењето на правото во областа на животната средина преку поефикасно административно и кривично спроведување, во согласност со европските стандарди.
-Отпадот не е проблем само на оние кои менаџираат со него – отпадот е проблем на сите нас. Сите ние од една страна сме негови жртви, чувствувајќи ги последиците од неговото несоодветно одлагање и третирање, но од друга страна пак, сме главни виновници за неговото настанување. Сите ние имаме право на чиста и здрава животна средина, но имаме и обврски правилно да делуваме за да ја зачуваме животната средина чиста и здрава, истакна Ирена Мирчовска, претседателка на Здружението „Еко Тим Исток“.
Во своето обраќање пред почетокот на трибината, градоначалникот на Кочани, Владко Грозданов нагласи дека одржувањето на хигиената и уредувањето на јавните простори е еден од приоритетите што ќе се реализира во тековниот период.
-Оваа недела детектиравме 21 мини депонија во централно градско подрачје, дневно исфрлавме по 30 камиони отпад и имаме досега исфрлено над 300 камиони по некои 5-6 кубни метри отпад, па пресметајте во што сѐ сме живееле. Управувањето со отпад не е само административно прашање, тоа е прашање во делот на здравјето, во делот на екологијата, економијата, социјалата, културата, безбедноста. Тоа едно сериозно и прашање со широк опфат. Во периодот што следи нашата општина решително ќе се насочи пред сѐ кон воведување на современи системи за селекција на отпад, подобрување на инфраструктурата за рециклирање, образовни кампањи кон граѓаните, создавање нови навики и свест за одговорно постапување со отпад, партнерства со научни институции, работење врз база најдобри практики и засилување во делот на спроведување на законските регулативи, истакна Грозданов.
На настанот учествуваа претставници институциите, од Локалната самоуправа, граѓански организации и правни експерти, кои од аспект на своето работење презентираа начини како да се применат законските регулативи и согледувања за унапредување на управувањето со отпад.
Трибината е дел од проектот „Зајакнување на соработката за локално влијание врз јавните политики за справување со отпад во општина Кочани“, имплементиран од Здружението „Еко Тим Исток“, во рамки на програмата за подгрантирање на проектот „Добро владеење во животната средина на Зелена Агенда за Западен Балкан”. Проектот го имплементираат Центарот за правни истражувања и анализи, Македонското здружение на млади правници и Фронт 21/42, а финансиски е поддржан од ЕУ.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
