Согласно законските обврски, Јавното претпријатие за комунални дејности „Облешево“ достави барање до Регулаторната комисија за енергетика за утврдување тарифи, односно цени за услугите што ги обезбедува за корисниците на територијата на општина Чешиново-Облешево.
Барањето се однесува за утврдување миналмни и максимални просечни тарифи за снабдување со вода за пиење, за собирање и одведување на урбани отпадни води, како и за пречистување на отпадните води за периодот 2025-2027 година.
Во барањето е наведено дека просечната тарифа на водата за пиење во 2025 година изнесува 30,81 денар за кубен метар вода, во 2026 година тарифата се зголемува на 31,44 денари, а во 2027 година треба да изнесува 32,09 денари за метар кубен. Притоа, за сите три години количината на испорачана вода се проценува на исто ниво од 65 илјади кубни метри, а се очекува регулираниот максимален приход да изнесува нешто повеќе од два милиона денари.
Просечната тарифа за собирање и одведување на отпадните води во текот на трите години регулиран период се движи од 10,05 до 10,39 денари за кубен метар, додека тарифата за нивно пречистување е од 2,49 денари во 2025 година до 2,58 денари во 2027 година. Проценетата количина на собрана и одведена отпадна вода во секоја од три години изнесува по 59,5 илјади кубни метри, додека годишно би требало да се пречистуваат по 48 илјади кубни метри. Регулираниот максимален приход по двата основа во текот на трите години е проценет од 720 до 743 илјади денари.
Во моментот тече периодот за доставување мислења од заинтересираните правни и физички лица во врска со предложените тарифи. Мислењата можат да се достават писмено, на адресата на Регулаторната комисија за енергетика или со е-пошта на erc@erc.org.mk и voda@erc.org.mk, најдоцна до 16 часот на 10 февруари 2025 година.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
