Министерот за здравство, Азир Алиу, при својата посета на Општина Кочани и на Општата болница со проширена дејност, упати пораки за поддршка на граѓаните засегнати од минатогодишната трагедија во клубот „Пулс“, нагласувајќи дека државата останува целосно посветена на нивното закрепнување.
Министерот истакна дека постои целосна грижа за нив, има посебна работна група која континуирано ги следи, а во однос на поплаките дека сè уште плаќаат партиципација за медицинските услуги, најави дека се бара правно решение за овој проблем.
-Дефинитивно ние работиме на креирање на програма, бидејќи знаете партиципацијата е законска надлежност на секоја институција да се плати за секој пациент. Разговараме со работната група да најдеме начин како да влезе во некоја од програмите коишто ги имаме постоечки, бидејќи тоа ни е едно од ветувањата и лично моја и на на Владата за да може да се реши тој проблем. Таа партиципација, колку и да е мала треба да се отстрани, се со цел да може таа комуникација помеѓу институциите и семејствата или или граѓаните коишто имаат некаков тип на по барање на третман да можа да не плаќаат партиципација, истакна министерот Алиу.
Според министерот, грижата за повредените не е парцијална, туку опфаќа секого на кого му е потребна помош
-Од време на време ако треба, се консултираат со нашите доктори, а се консултираат и со лекари од надвор. Засега, моите информации зборуваат дека сите пациенти коишто имаат некаква потреба од третман, а којшто не е возможен во земјата, тоа го правиме за да може и да се консултираме или евентуално да се носат надвор. Освен првата група што помина и се анализираат сите здравствени проблеми коишто ги имаат овие наши граѓани, поминаа низ втора процедура со којашто уште појасно ни е трендот на подобрување на здравствената состојба кај овие наши граѓани. Тоа ни е приоритет и како држава и како болница и како град. Знаете дека за кратко доаѓаме до една година од таа трагедија, а и понатаму работиме за да може да да се креира екосистем за овие граѓани коишто ќе се чувствуваат побезбедни и подобро третирани во нашето општество, додаде Алиу.
Паралелно со грижата за пациентите, Министерството за здравство започнува процес на децентрализација и регионализација, што вклучува и значајна реформа на медицинските специјализации.
-Здравството веќе влегува во таа фаза на децентрализација, на регионализација и тој дел ни е многу битен, и инфраструктурно и со човечки капацитети, работиме и со технологии за да може да биде сетиран како што е а потребно и по европски стандарди. Во таа насока, исто така менуваме и специјализации. Веќе нема да ги имаме шестгодишни и петгодишни специјализации, фактички насочени специјализации, бидејќи потребите кај нас кажуваат дека ние имаме потреба како инфраструктура, како демографија, да имаме и профили на општи специјализации и затоа тие ги враќаме, ќе бидат четиригодишни специјализации со цел побрзо да стигнеме до капацитети коишто нам ни се потребни, изјави Алиу.
Министерот изрази задоволство од досегашните видливи резултати во инфраструктурата, нагласувајќи дека неговиот домаќински пристап има за цел да ја врати довербата на граѓаните во здравствените институции.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
