Во Кочани денеска се одржа 38. „Марш за ангелите“, посветен на жртвите од трагедијата во клубот „Пулс“.
Маршот започна од Паркот на револуцијата, по што учесниците поминаа низ Трговскиот центар, покрај Управата за јавни приходи и Полициската станица, за на крајот да се соберат пред објектите на Основниот суд и Обвинителството.
Пред присутните се обрати Александар Наунов, претседател на Здружението „16 март 2025 – Кочани“, кој истакна дека граѓаните се обединети од болката, но и од силата да не молчат и да не дозволат вистината да биде потисната. Тој упати остра порака дека нема да се дозволи „перење на совеста“ врз туѓа трагедија ниту газење врз смртта на децата заради спас на нечија позиција или углед.
-И тука ја кажуваме суштината: Суштината е ОДГОВОРНОСТА. Факт е дека денес на обвинителна клупа седат дел од лицата поврзани со трагедијата. Но, исто така факт е – болен, непобитен факт – дека постојат луѓе со многу поголема моќ, обврски и надлежности, кои воопшто не се ни опфатени. Луѓе кои имале должност да спречат… а не спречиле. И да не заборавиме: тоа што денес не се опфатени не значи дека се ослободени од одговорност. Законот е јасен – ова дело застарува за 20 години. Ќе има време. Ќе има ден. И ќе ги чекаме и нив на обвинителната клупа. Вчера слушнавме дека се бара свикување колегиум за повторно разгледување на обвинението и евентуално ослободување на дел од обвинетите. Нема да навлегуваме во туѓи стратегии, но ќе кажеме една вистина што никој колегиум не може да ја избрише: Колегиумот може да прегледува документи… Но не може да брише факти. Не може да брише пропусти. Не може да брише нечии должности што биле игнорирани, истакна Наунов.
Според Наунов, одговорноста не е во тоа кој се обидувал да се спаси во моментот на ужасот, туку во тоа кој имал овластување и моќ, а не ги извршил своите обврски.
-Ако некој имал обврска и не постапил, ако пропуштил дејствија што биле неопходни, ако постои причинско-последична врска или службен пропуст –одговорноста останува. Ревизијата е техничка процедура. Не е амнестија. Ние не сме овде за одмазда. Ние сме овде за правда. За ред. За систем што ќе ги штити децата – не систем што ќе ги остави да загинат. Родителите никогаш не се откажуваат. Можеби ќе нè уморите, но нема да нè скршите. Можеби ќе не одолговлекувате, но нема да не замолчите. Вистината ќе излезе на виделина – сакал некој или не, заклучи Наунов.
Родителите и Здружението порачаа дека не бараат одмазда, туку правда, ред и систем што ќе ги штити децата, наместо да ги остави да загинат. Додадоа дека ќе продолжат да чекорат, да зборуваат и да се борат за нивните, но и за сите деца, како и за животите што никогаш не смееле да бидат изгубени.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
