Околу 130 планинари, викендов учествуваа на Вториот меморијален планинарски марш „Стамен Каровски“, чиј организатор беше ПСК „Осогово“ од Кочани.
Најголемиот дел од планинарите беа од Кочани и Штип, а имаше претставници од други клубови во државата, како и од Србија и Грција.
Маршот почна од паркингот на туристичкиот локалитет Пониква и движењето се одвиваше по маркирана планинарска патека, која над 80 отсто поминува низ букова шума, а последните 500 метри до врвот Панаѓур, учесниците се движеа по пасиштен терен.
Патеката до врвот беше од лесна категорија и планинарите во двата правца ја поминаа за четири часа, со попатни паузи и задржување на врвот.
-Татко ми беше спортски човек, голем љубител на природата и планинарењето, поранешен каратист и фудбалер. Ви благодарам на сите што присуствувавте на овој настан, а целта е и понатаму да го чуваме и негуваме неговиот спомен, истакна Мартин Каровски, син на Стамен Каровски.
На враќање во манастирскиот комплекс „Св. Василиј Велики“ на Пониква организаторот ПСК „Осогово“ за учесниците на маршот организираше планинарска дружба и традиционално планинарско гравче.
На сите учесници на помагателите на меморијалниот планинарски марш им беа доделени благодарници. Пешачењето до врвот Панаѓур се реализираше во соработка со Локалната самоуправа на Кочани, како и со подддршка од Федерацијата на планинарски спортови на Македонија.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
