На патниот правец од излезот на селото Бели кон Нивичани, поточно на локалитетот Белски Дол каде што водата преминува преку коловозот, се спроведе акција за расчистување на речното корито што со години е претворено во дива депонија.
Наместо долгогодишната слика на негрижа, на терен беше ангажирана механизација која го отстрани наталожениот отпад за да ја спречи потенцијалната еколошка катастрофа.
Со оглед на тоа што оваа вода протекува низ селото Тркање, а потоа низ оризовите површини се влева директно во Кочанска Река, чистењето е од пресудно значење за заштита на екосистемот и земјоделското производство.
Акцијата ја спроведе Општина Кочани во соработка со КЈП „Водовод“ – Кочани. Главната цел е целосно отстранување на депонијата која се наоѓа на околу еден километар од селото Бели и враќање на природниот изглед на овој значаен водотек.
-Оваа река не е само водотек – таа е природен ресурс кој има значење за локалното население и за зачувувањето на целиот екосистем. Затоа, нејзината заштита е заедничка обврска и одговорност. Ова е дел од зацртаниот пат за создавање на почиста, поуредена и поздрава општина. Расчистувањето на Белски Дол е само една од низата конкретни активности на терен со кои се покажува грижа за природните локалитети, се истакнува во повикот од Општината до граѓаните да не исфрлаат отпад на оваа и другите локации во околината.
Во расчистувањето на отпадот од дивата депонија кај Белски Дол е ангажирана механизација на КЈП „Водовод“, при што од Локалната самоуправа порачуваат дека грижата за природата мора да биде трајна вредност, а одговорниот однос кон ваквите места е она што треба да им се остави во наследство на идните генерации.
Со оваа акција, која се совпаѓа со одбележувањето на верскиот празник посветен на Свети Пантелејмон во манастирот во селото Пантелеј, се прави значаен чекор кон елиминирање на жариштата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
