Депонијата за комунален отпад кај селото Бели уште ја чека градежната механизација во рамки на почетните активности за нејзино затворање, што ги најави локалната власт во Кочани. Според официјалното известување, од почетокот на оваа недела требаше да има активности, но проверката што ја направивме околу пладне покажа дека таму, освен камионите кои продолжуваат да го депонираат отпадот и една помала машина што дошла да помогне да ги извлече од калта, друга механизација немаше.
Пристапот што бил оформен за влез на машините на депонијата повторно се затрупува со отпад, а чадот продолжува да излегува од ѓубриштето. Поради недостиг на машина за расчистување, камионите се принудени ѓубрето да го истураат на тесниот приод што им преостанува. Тоа значи дека ако продолжи вака, за ден-два ќе стигнат до портата на депонијата.
Претставници на Месната заедница од Бели дојдоа да направат увид дали има барем почетни активности за затворање на депонијата, но заминаа разочарани од она што го видоа.
-Дојдовме да видиме дали, како што најавија, од понеделник ќе почне да се затвора депонијата, ама од тоа – ништо. Нема ниту машини, ниту земја. Ете, „Водовод“ носи отпад, од Виница носат, од Каменица, од Облешево носат, гледаме дека ништо не е преземено. Ова е дива депонија, така е прогласена од јавниот обвинител од Скопје, кој доаѓаше тука. Од вчера требаше да почне да се затвора, ама ништо од тоа нема. Вчера повторно чадеше, ноќеска заврна, но нема санирано ништо. Не може ова да биде регионална депонија, истакна Злате Данов, член на Месната заедница од Бели.
Минатата недела од Општина Кочани информираа дека градоначалникот Љупчо Папазов имал состанок со заменик-министерката за животна средина Ане Лашкоска, со претставниците задолжени за реализација на проектот од Министерството за животна средина и Министерството за финансии и избраните изведувачи за затворање на непрописните депонии. Притоа бил информиран дека се очекува наскоро да се распише јавен повик за избор на изведувач на Регионалната депонија кај светиниколското село Мечкуевци.
И додека да се преземат конкретни активности, жителите на Бели и целата Кочанска Котлина ќе продолжат беспомошно да го гледаат црно-белиот чад од депонијата и ќе го вдишуваат воздухот за кој мерната станица често покажува надминување на законските лимити за присуство на штетни честички.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
