Застрашувачки бројки според кои потрошувачката на вода за пиење го надминува капацитетот на градскиот водовод во Кочани беа изнесени на последната, 14. седница на Советот на Општина Кочани.
Според официјалните податоци, но и од дискусиите на советниците за проекцијата за користење на вода за пиење за сезоната пролет-лето 2026 година, се навестува сериозна криза во претстојниот период.
Официјалните извештаи велат дека вкупниот капацитет на бунарскиот систем во Кочани изнесува 238 литри во секунда. Сепак, статистиката од првите три месеци на 2026 година покажува загрижувачки тренд – потрошувачката на вода е зголемена за 17,72% во споредба со минатата година. Доколку овој тренд продолжи, се предвидува дека во јули потрошувачката ќе достигне 250 литри во секунда, што директно го надминува капацитетот на системот.
-Очигледно дека имаме зголемена потрошувачка на вода во 2026 година. Очекувано е дека во јули месец да имаме околу 250 литри во секунда бројка потрошувачка на вода, што го надминува максималниот капацитет од 238 литри во секунда. Со вакви проекции ќе се соочиме со моменти кога најпрво високите места, а потоа мислам дека тој тренд ќе се префрли на пониските места со немање вода во летниот период, истакна советникот Сашко Иванов.
Уште попоразителен е фактот за т.н. неприходувана вода. Во 2025 година, КЈП „Водовод“ пласирало 5,9 милиони метри кубни вода, а фактурирало само 1,4 милиони. Ова значи дека дури 76,37% од произведената вода се губи во системот поради застарена мрежа, дефекти или комерцијални загуби.
-Кочани пие најскапа вода во Македонија, загубата беше под 60 па се покачи на 70%. Тоа е навистина огромна количина на загуба на вода којашто треба да стигне, а ја нема никаде, рече советникот Иван Мишев, при што изрази сомнеж за квалитетот на водата од трите плитки бунари со длабочина од само 10 метри, кои сè уште се користат поради недостиг на капацитет, иако се подложни на површинско загадување.
Раководителот на Секторот „Водовод“, Зоранчо Георгиев, појасни дека системот е под голем притисок и дека мрежата е стара помеѓу 40 и 60 години.
-Моментално сме на некој си максимум што го снабдуваме градот без проблеми со вода, со просек околу 200 литри во секунда, а максимумот ни е 238. Ако имаме сушен период, што тоа е најчесто јули-август, може да дојде до рестрикција или отежнување во водоснабдувањето, рече Георгиев.
Георгиев додаде дека се прават напори за реконструкција на главниот потисен цевковод и инсталација на 5,000 нови дигитални водомери за далечинско отчитување, со цел да се намалат кражбите и загубите.
Како итна мерка за справување со хаосот во водоснабдувањето, на седницата беше предложен и усвоен заклучок за формирање на координативно надзорно тело. Ова тело ќе биде составено од претставници на Општината, Управниот одбор на „Водовод“ и стручни лица, со цел постојано да ја следат состојбата и да превенираат целосен колапс на системот во текот на летото.
Советниците апелираа до граѓаните за крајно рационално користење на водата, нагласувајќи дека „борбата веќе не е за храна, туку за вода“.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
