Момчето – гениј од Кочани, кое ја освои Европа, ќе ги брани боите на Македонија на најпрестижната Светска олимпијада по информатика.
По освоеното злато на Европската олимпијада за млади по информатика, Владимир Грчев годинава го оствари и најголемиот успех во својата досегашна кариера – избор во македонскиот тим за Светската олимпијада по информатика (IOI), најпрестижното светско натпреварување за средношколци по информатика.
Грчев е четирикратен државен првак по информатика и еден од најуспешните млади информатичари што ги има Македонија. Веќе пет години по ред ја претставува нашата држава на најсилните меѓународни натпревари, а неговата импресивна низа продолжува – од секој меѓународен настап досега се враќал со освоена награда или медал.
Ова лето за Владимир ќе биде исполнето со два исклучително значајни меѓународни настани. Неколку недели пред настапот на Светската олимпијада по информатика, тој ќе отпатува во Бремен, Германија, каде што е поканет да учествува на престижен информатички камп организиран од JetBrains, една од водечките европски ИТ компании. На кампот ќе присуствуваат дел од најталентираните млади информатичари од целиот свет, што претставува огромно признание и ретка можност за размена на знаења и искуства со идните светски лидери во информатиката.
По завршувањето на кампот, Грчев ќе ги брани боите на Македонија на Светската олимпијада по информатика како еден од само четворицата ученици кои годинава го сочинуваат националниот тим.
Неговите успеси се резултат на години посветена работа, натпреварувачко искуство и постојана желба за напредок. Од најмлад натпреварувач во државата до европски шампион и учесник на најголемата светска олимпијада по информатика, Владимир продолжува да биде пример за тоа што можат да постигнат македонските млади таленти кога добиваат можност да го покажат својот потенцијал.
Кочани повторно има со што да се гордее, а Македонија добива уште една потврда дека нејзините најдобри ученици можат рамноправно да се натпреваруваат со светската елита.
Му посакуваме многу успех на претстојните меѓународни предизвици и веруваме дека Грчев ќе продолжи да ја претставува Македонија на највисоко ниво, како што тоа успешно го прави веќе пет години.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
