Додека екстремно високите температури ја зголемуваат потрошувачката на вода до максимум, водоводната мрежа во Кочани и околните населени места на повеќе локации е во колапс.
Граѓаните секојдневно пријавуваат нови дефекти, но реакцијата за санирање е бавна или се одложува со денови, па и недели. Тоа резултира со илјадници литри истечена вода за пиење и сериозни штети по приватните објекти.
Специфична е состојбата во населбата Селиште во Оризари велат жителите на улицата „Осоговска“, кои испратија и видео снимка до Канал 8, реагирајќи дека водата истекувала повеќе од еден месец. Рекоа дека се соочуваат со сериозен проблем бидејќи, поради стрмниот терен, водата директно се слева во приземните простории на блиските куќи.
-Од снимките може да се види дека истекува прилично голема количина вода во секунда, веројатно е оштетена главна водоводна цевка, велат загрижените граѓани кои иако го пријавиле дефектот, чекале екипите на КЈП „Водовод“ да излезат на терен.
Во меѓувреме, во нивните соби веќе е појавена влага и мувла. Проблемот не е само во староста на цевките, туку и во квалитетот на досегашните поправки.
На улицата „Иван Иванов Балашо“ бр. 66 во Кочани, уште пред празникот Илинден цевката пукнала по четврти пат на истото место. И покрај тоа што Општината и „Водовод“ биле известени преку СМС пораки, реакција нема веќе неколку дена.
Овој дефект претставува и безбедносен ризик бидејќи постои можност да падне ѕид на еден од објектите. Дополнителен револт кај граѓаните предизвикува и фактот што по секоја интервенција остануваат руинирани тротоари.
-Тротоарот беше бетониран од Општината, а „Водовод“ после нивното работење остава рушевини, реагираат жителите од оваа улица.
Зголемениот притисок во цевките, предизвикан од енормната потрошувачка во овој исклучително топол период, е една од главните причини што мрежата попушта како „решето“.
Граѓаните велат дека неквалитетното и постојаното крпење на едни исти дефекти само ги продлабочуваат загубите на вода во време кога секоја капка е драгоцена. Притоа, кочанските улици и подруми се претвораат во мали реки, оставајќи ги граѓаните сами да се справуваат со последиците.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
