Најдобрите ученици од основните училишта од збратимениот хрватски град Крижевци, заедно со нивни наставници се наоѓаат на зимски распуст во Кочани, а сместени се во објектите на планинскиот туристички центар Пониква.
Трошоците за нивното сместување и престој се покриени со средства од буџетот на Локалната самоуправа на Кочани, како дел од долгогодишната соработка на општините од двете држави.
-Во рамки на престојот во Кочани, учениците од Крижевци го посетија и ОУ „Никола Карев“ каде имаа заеднички активности во рамки на одбележувањето на Денот на мајчиниот јазик со своите врсници и наставниците од училиштето домаќин. Во сместувачките капацитети на Пониква пак, хрватските ученици и нивните наставници ги посети градоначалникот Љупчо Папазов и им посака пријатен престој на Осоговските Планини. Тие искажаа благодарност за гостопримството и ги пренесоа убавите впечатоци од дружењето со своите домаќини, информираа од Општина Кочани.
Соработката и збратимувањето меѓу меѓу двете општини е од пред четири децении, а нашите најдобри ученици во летниот период дел од распустот поминуваат на хрватското приморје на сметка на градот Крижевци.
Главни цели на соработката е размена на знаења и запознавање со традициите и културите помеѓу учениците, како и промоција на капацитетите и условите на Пониква заради зголемување на бројот на посетители.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
