Советот на Општина Кочани едногласно ја прифати донацијата од Амбасадата на Република Полска за гинеколошкото одделение во Општата болница, со што ќе се овозможат безбедни хируршки интервенции за жените од целиот регион.
Донацијата не е во парични средства, туку како конкретна медицинска опрема во вредност од 48 илјади евра, што е критично потребна за функционалноста на гинеколошката операциона сала.
Фокусот е ставен на овозможување услови за вршење итни царски резови и други гинеколошки интервенции во самата болница, со што ќе се избегне досегашната пракса на итно препраќање на пациентките во Штип или Скопје.
Градоначалникот Владко Грозданов, образложувајќи ја важноста на оваа соработка, истакна дека донацијата доаѓа во вистински момент за да се спаси Oдделението од технолошка застареност.
-Станува збор за донација која би била монтирана после реновирањето на гинеколошката операциона сала. Со тоа во случај на природно породување, кога може да дојде момент да е потребен итен царски рез, истиот ќе биде извршен овде. Досега ние во такви ситуации решението го баравме во што побргу упатување во Штип или Скопје, истакнува Грозданов.
Според информациите што ги изнесе пред советниците, дел од постојната опрема во Болницата е во катастрофална состојба и датира од средината на минатиот век. Донацијата вклучува нов операционен стол, операционо светло и хистероскоп кој ќе биде компатибилен со веќе постојниот лапароскопски столб.
-Во моментот операциониот стол е од времето на 60-тите години. Р’ѓав, скапан, не функционира. Операционото светло во операционата сала, кое е многу важно кога се работи на отворена хирургија, исто е од 60-тите, руско, пишува СССР. Со новата апаратура, како што е хистероскопот, ќе им се помогне на граѓаните и финансиски, бидејќи овие интервенции во приватните клиники чинат околу 1.000 евра, а сега ќе можат да се вршат во Кочани, рече Грозданов.
Иако Општина Кочани нема директна надлежност во работата на Општата болница, локалната власт се одлучи да биде посредник во оваа донација за доброто на граѓаните.
-Општина Кочани нема ингеренции во Општа болница Кочани, но направивме едно добро за оваа институција, бидејќи имаме ингеренции да се грижиме за општото здравје на граѓаните во општината, заклучи Грозданов.
Советот на Општината изрази надеж дека оваа опрема ќе биде поттик за персоналот и дека понатамошните напори за реконструкција на салата ќе бидат поддржани и од општествено одговорни компании.
Пред неколку дена градоначалникот Грозданов го потпиша договорот за донацијата со амбасадорот на Полска, Мариуш Бримора, а тоа е дел од поддршката по трагедијата во „Пулс“ во март минатата година.
*насловната фотографија е креирана за илустрација
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
