На околу еден месец пред почетокот на првенството во Втората фудбалска лига, екипата на „Осогово“ ги почна подготовките за настап во повисок ранг на натпреварување.
На прозивката и првиот тренинг што попладнево го одржа шефот на стручниот штаб, Ефтим Аксентиев се јавија 18 фудбалери, но во наредниот период се очекува екипата да се засили со уште неколку играчи.
-Подготовките целосно ќе ги реализираме на стадионот „Никола Мантов“, планирани се и неколку пријателски натпревари, а првата средба е закажана на 23 јули, во Кочани, а следната на 29 јули во Пехчево со второлигаш од Крушевац. Термините за другите средби дополнително ќе ги објавиме. Од играчкиот кадар имаме двајца повратници од „Слога“ и „Беласица“, преговараме со уште два-тројца искусни играчи, но нема да брзаме, затоа што сакаме целиот товар да биде на нивна страна. Првенството стартува на 12 август, што значи дека имаме доволно време за добро да се подготвиме физички и да го дочекаме стартот во Втората лига, истакна Аксентиев.
Управниот одбор на „Осогово“ е пред голем предизвик да ги обезбеди потребните услови за натпреварувањето, како и неопходните финансии за покривање на трошоците, со оглед што учеството во второлигашкото друштво чини многу повеќе од претходната сезона во Третата лига.
-Од организациски аспект можеме да кажеме дека клубот подготвено ќе ги дочека предизвиците што ги носи Втората лига. Поразговаравме со Локалната самоуправа, со приватниот сектор и неколку други спонзори и се надеваме дека финансиската конструкција што ќе биде потребна, ќе ја заокружиме во целост, истакна Перо Георгиевски, претседател на Управниот одбор на „Осогово“.
Котизацијата за учество во Втората фудбалска лига изнесува 20 илјади евра, а покрај тоа клубовите треба да имаат професионално ангажирано најмалку двајца играчи, за кои ќе се покрива минималната плата заедно со придонесите за здравствено и пензиско осигурување, како и другите давачки.
Неопходни се и подобрувања на условите на стадионот „Никола Мантов“, за што се најавува реконструкција на дел од подтрибинскиот простор со соблекувалните и тоалетите, како и уредување на игралиштето, со редовно одржување на теренот и отстранување на дрвјата и грмушките покрај оградниот ѕид.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
