Локалната самоуправа на Зрновци ќе инвестира средства од сопствениот буџет со кои треба да се подобрат условите на фудбалското игралиште во општинскиот центар.
На последната седницата на Советот на Општината едногласно беше поддржана предлог-одлуката да се обезбедат 60 илјади денари за да се исполнат потребните критериуми за одигрување фудбалски натпревари во првенството на Третата лига – исток. Со средствата треба да се реновира објектот во кој се сместени соблекувалните за домашните и гостинските играчи, како и да се направат извесни подобрувања на условите на теренот за официјалните претставници на натпреварите.
Една од причините за тоа е што фудбалскиот клуб „Светлост“ од ова првенство обезбеди учество во лигата, со што по повеќе години во Зрновци повторно ќе се играат официјални натпревари на кои ќе гостуваат екипи од регионот.
Неопходноста од подобрување на условите на игралиштето ја образложи градоначалникот Борчо Коцев, при што нагласи дека не се работи за голема сума која треба да ја инвестира Општината, бидејќи трошоците за клубот ги покрива друг субјект.
-Таму треба соблекувалните да ги приспособиме, да има струја, топла вода, како и оние натстрешници за делегати, судии и гости. Во контакт со претседателот на Општинската фудбалска лига од Кочани ни беа кажани кои услови треба да се исполнат, и за тоа објектче нема да потрошиме многу пари, но основните услови се да поставиме бојлери, плочки, шкафови и има разбиена врата што треба да се поправи. Ќе ги средиме тие работи за да се стартува со сезоната, истакна Коцев.
Со предвиденото реновирање на соблекувалните и другите подобрувања околу теренот, фудбалското игралиште во Зрновци ќе може да ги задоволи основните стандарди за играње натпревари.
Првенството во Третата фудбалска лига – исток стартува овој викенд, а екипата од Зрновци во првото коло ќе гостува во Свети Николе против тимот на „Овче Поле“. Првиот натпревар на домашен терен пак, ќе го игра во рамки на второто коло, на 22 септември против „Малеш“ од Берово.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
