Новиот шеф на стручниот штаб на второлигашот „Осогово“’, Добринко Илиевски попладнево го одржа првиот тренинг со фудбалерите. Тоа беше негово официјално запознавање со играчкиот кадар што му стои на располагање, а на теренот се појавија дваесетина играчи, меѓу кои се и повратниците и новоангажираните во клубот.
Илиевски искажа подготвеност во релативно краткиот период што преостанува до почетокот на првенството во Втората фудбалска лига, да вложи максимални напори во подготовката на фудбалерите и остварувањето на главните цели на Управниот одбор на „Осогово“ за претстојната сезона.
-Чест и задоволство ми е што сум во Кочани и во „Осогово“, што како клуб ми лежи на срце, со оглед што пред околу 20 години бев тука како фудбалер. Имав прекрасно искуство, во едно добро време за „Осогово“, така што задоволство е да работам со клубот што го сакам. Во однос на подготовките, малку сме во цајтнот, со оглед што јас се приклучив покасно, така што некои работи ќе решаваме во ôд, а првиот пријателски натпревар ни е в недела со „Саса“. Другите натпревари што се планирани, ќе се договараат тековно и корегирано, затоа што новиот стручен штаб има нови планови, односно нов систем на работа и сето тоа во деновите што следат ќе биде регулирано, истакна Илиевски.
Подготовките на клубот ќе се реализираат на стадионот „Никола Мантов“ поради буџетот со кој располага екипата, но и овде ги има условите за тоа, а ќе се направат напори за подобрување со опрема и реквизити за работа, но и во играчкиот кадар.
-Работиме на пополнување на позиции во клубот за кои мислиме дека се дефицитарни, играчкиот кадар што е во моментот можеби не е на ниво како што потребен во Втораа лига, затоа што сите екипи се со големи амбиции и со прволигашки играчи, па во ôд ќе се трудиме да ги дополниме тие позиции што недостигаат, но и од овој играчки кадар да извлечеме максимум. Првата цел во овој момент, имајќи предвид каква е состојбата, со фудбалери и други услови, мислам дека опстанокот би бил една реална цел, но јас како човек и тренер секогаш имам повисоки амбиции и ќе се трудиме да привлечеме квалитетни играчи кои од коло во коло ќе го креваат нивото и позицијата на клубот на табелата, додаде Илиевски.
Заедно со Илиевски во стручниот штаб се и Горан Гоцевски од Македонска Каменица, кој ќе биде помошник тренер, како и Јоже Јованов кој ќе работи со голманите.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
