Семејствата, пријателите и граѓаните на Кочани денеска по 40-ти пат маршираа во спомен на своите сограѓани кои ги загубија животите во кобниот пожар во објектот „Пулс“.
Здружението „16-ти Март 2025 Кочани“ јавно го повтори својот револт од институционалниот молк, а неговиот претседател, Александар Наунов, упати последно предупредување до надлежните служби.
Во своето обраќање, Наунов ги истакна клучните барања и болката на семејствата преку неколку силни пораки.
-На 14 јануари 2026 година, Здружението на граѓани „16-ти Март 2025“ – Кочани официјално достави барање до Институтот за судска медицина, криминалистика и медицинска деонтологија при Медицинскиот факултет – УКИМ Скопје, со едно единствено барање – вистината. Побаравме јасен и недвосмислен одговор: – дали Институтот бил вклучен во токсиколошките анализи, – дали било испитувано присуство на цијаниди или сродни токсични соединенија, – и доколку такви анализи не биле извршени, тоа јасно да биде наведено. Од тоа барање поминаа веќе два месеци, а до денес немаме никаков одговор. Дополнително, уште пред четири месеци побаравме итна средба со претставници од Судска медицина. Наместо конкретни одговори, добивме само колективна средба со директорот на Судска медицина, на која ни беше кажано дека дополнително ќе бидеме повикани и детално ќе ни биде се објаснето. Од тогаш — повторно целосен молк, истакна Наунов.
Семејствата добиле потврда од Природно-математичкиот факултет (ПМФ) – Скопје дека е изготвен вешт наод по наредба на Основното јавно обвинителство (ОЈО) – Кочани, но без конкретни детали за анализите.
-ПМФ нè упатува кон ОЈО Кочани. ОЈО молчи. Судска медицина молчи. На 16.03.2025, кога ни ги однесовте децата во црни вреќи во Скопје за обдукција, нè убедувавте дека тоа е задолжителна постапка и дека мора детално да се утврди вистинската причина за нивната смрт. Со скршени срца ви поверувавме. Се противевме , но со огромна болка Ви ги предадовме, верувајќи дека институциите ќе си ја завршат работата чесно и професионално. Чекавме четири дена. Четири дена во кои не можевме достоинствено да се простиме од нив. Четири дена во кои не можевме да ги испратиме како што заслужуваа, да ги гушнеме, да ги бакнеме за последен пат… Зошто? За да ни ги вратите со предупредување да не ги отвараме.. да не ги видеме искасапени и со сини кеси на главите, додаде Наунов.
Наунов упати директно прашање за одговорност, повикувајќи ги институциите да престанат со прикривањето.
-Доколку во наредните 3 дена не добиеме јасен, писмен и сеопфатен одговор, ние како семејства ќе дојдеме пред Судска медицина и нема да си заминеме додека не ја добиеме вистината што ни ја должите! Нема да прифатиме повеќе молк. Нема да прифатиме повеќе префрлање на одговорност, заклучи Наунов.
Колоната на Маршот се движеше по вообичаената рута во центарот на Кочани, а заврши во Паркот на Револуцијата од каде и тргна.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
