По одржаната јавна расправа во Штип за Нацрт-просторниот план на Република Македонија за периодот 2021–2040 година за Источниот плански регион, што ја организираше Министерството за животна средина и просторно планирање, со реакција и прес-конференција истапи советничката група на СДСМ во Советот на Општина Кочани.
Советникот Сашко Иванов упати остри критики за предложениот просторен план, предупредувајќи дека понудените решенија директно го загрозуваат кочанското земјоделство и опстанокот на оризопроизводството.
-Ако планот на Владата според кој ќе се развива регионот се предложените плански решенија за зголемување на вкупните површини под експлоатација за критични минерали од 2 на 10 квадратни километри или зголемување на дури пет пати повеќе, тогаш јасна е пораката од оваа власт дека државата е подготвена да ги распродаде природните ресурси само заради туѓи бизнис интереси. Но, она што најповеќе го засега кочанскиот регион се предложените плански решенија со кои се предвидува намалувањето на површините засеани со ориз. Според овој Предлог-просторен план се предвидува намалување за дури 31% или 1/3 на површините под ориз, истакна Иванов.
Советничката група на СДСМ ги поврза планските мерки со рекордно ниските откупни цени и одбивањето на финансиската поддршка за земјоделците.
-Дали понижувачката политика на Владата во однос на рекордно најниската откупна цена на оризот во моментот се дел од оваа погубна стратегија за кочанското „бело злато“ и за земјоделците? Дали со тоа што пратениците од владеачкото мнозинство одбија да гласаат за предлог-законот на Социјалдемократскиот сојуз за финансиска поддршка на земјоделците во висина од 10 денари за килограм ориз е дел од планот за уништување на кочанското земјоделство? Ако ова е планот како ќе се развива регионот, тогаш истиот тој е план за доуништување на Кочани и регионот, план за доиселување на населението и план за стимулирање на сиромаштијата, рече Иванов.
На крајот, тој порача дека партијата ќе застане во заштита на земјоделците и ќе реагира со сите дозволени мерки за да спречи уништување на чесниот земјоделец, да го спречи уништувањето на брендот на македонското земјоделство, кочанскиот ориз, кој покрива дури 98% од потребите на државата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
