Основните училишта и Полициската станица во Кочани добија дел од лаптоп компјутерите што во Општината беа вишок, откако членовите на Советот од претходниот состав ги вратија по завршувањето на мандатот. Со тоа исполнета е одлуката што беше донесена на една од седниците со кој советниците дадоа согласност за бесплатно преотстапување на уредите.
Според писменото известување од Локалната самоуправа, по еден лаптоп добија основните училишта „Свети Кирил и Методиј“, „Никола Карев“, „Раде Кратовче“, „Малина Попиванова“ и „Крсте Мисирков“, а два Полициската станица од општа надлежност – Кочани, откако претходно Општината добила службено барање од оваа институција. Сите преносните компјутери што се преотстапени се од ист модел, произведени 2013 година.
По преземањето на функцијата, градоначалникот на Општина Кочани, Николчо Илијев, се соочи со нерационални набавки извршени на крајот на претходниот мандат. Една од нив беше набавката на 24 компјутери, за кои Општината сè уште ги сервисира обврските кон набавувачот.
На крајот на мината година Илијев најави дека најверојатно дел од компјутерите ќе добијат локалните институции во општината.
– Да им ги доделиме на училиштата, на Полициската станица кои се жалат дека немаат компјутери, на исниституиците на кои им се потребни да ги поделиме, бидејќи тоа е технологија и техника која многу брзо застарува и веројатно и батериите, ако не се користат, ќе пропаднат и тогаш ќе треба да ги фрлиме, рече во декември 2017 година, Николчо Илијев, градоначалник на Општина Кочани.
Покрај преносните компјутери што ги вратија претходните членови на Советот, за набавката на новите 24 лаптопи и другата компјутерска техника непосредно пред локалните избори во октомври, општинската адмнинстрација на претходниот градоначалник избрала понуда вредна над 20 илјади евра. Иако немало голема потреба од толку високи трошоци, опремата беше испорачана, а обврската за плаќање ја наследи новиот градоначалник.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
