Општините Кочани и Пробиштип почнуваат нова иницијатива за воспоставување меѓуопштинска соработка, а причина за тоа е заедничкиот проблем со одржување на хигиената и комуналната опрема на Пониква. Всушност, соработката се наметнува како потреба откако се изградија поголем број угостителски објекти, како и згради за индивидуален и колективен престој, со што создавањето комунален отпад стана сериозно прашање за кое од поодамна се бара соодветен одговор.
Постапката за воспоставување на соработката ќе ја разгледува Советот на Општина Кочани кој треба да даде согласност на седницата закажана за в четврток. Со одлуката се предлага давање на комунална услуга за собирање, транспортирање и депонирање на комунален цврст отпад од рекреативниот центар Пониква, што се наоѓа на територијата на општина Пробиштип. Услугата ќе ја обезбедува Општина Кочани преку КЈП „Водовод“. Притоа во предлог одлуката се нагласува дека можни се финансиски импликации од соработката, односно да се плаќа надоместок.
Воспоставувањето соработка меѓу двете општини нема да биде за првпат, особено не за Пониква. Сличен обид имаше пред пред шест-седум години, кога беше формирано и меѓуопштинско претпријатие „Пониква КП“ кое требаше да стопанисува со опремата и да се грижи за планинскиот рекреативен центар.
Иако се најавуваше како прв успешен проект за заедничко јавно претпријaтие во Македoнија, времето покажа дека очекувањата биле нереални. Кога во 2013 година беше најавено неговото основање, беше речено дека општините Кочани и Пробиштип ќе ангажираат по двајца работници кои веќе ја поминале почетната обука за обврските што ќе ги извршуваат, а посетувале и дополнителната обука за користење и управување со новата опрема што пристигна во ски-центарот.
Кон крајот на 2018 година ова претпријатие беше ликвидиарано. Дали сега соработката ќе биде успешна и ќе трае подолго повторно ќе покаже времето.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
