Иницијативата за изготвување Стратегија за безбедност во сообраќајот во Кочани продолжи со втора средба на членовите на пошироката работна група, кои се вклучени во дефинирањето на главните цели што треба да ги содржи документот.
На средбата беше направена глобална анализа на проблемите во сообраќајот, како и причините поради кои е загрозена безбедноста на сите учесници.
-На денешната втора средба зборуваме за проблемите што нè мачат во сообраќајот, заедно со претставници од институциите, повикани се и претседателите на урбаните заедници, од Општината, од Полицијата, а можат да присуствуваат и сите граѓански здруженија и физички лица кои пројавија интерес да присуствуваат. Тоа ќе можат да го направат и на следната средба што ќе се случи во септември. Зборуваме за тоа што е потребно за да го зголемиме нивото на безбедност на сите учесници во сообраќајот, истакна Жаклина Пауновска Анѓелковиќ, овластена инспекторка за патен сообраќај во Општина Кочани.
Стручно излагање за проблемите со безбедноста во сообраќајот и трендовите за негово подобрување, со искуство од европски и пошироки рамки изнесе експерт од Република Србија кој е ангажиран од македонското Министерство за траснпорт и врски во рамки на проектот за поврзување на локалните патишта.
-Зборуваме за општите проблеми што ги предизвикува безбедноста во сообраќајот во светот. Во 2020 година безбедноста во сообраќајот е идентификувана како трет причинител за смртта на популацијата во светот, поради што е многу важно да се превенира и систематски да се пристапи на проблемот со безбедноста во сообраќајот. Конкретно за Кочани, мислам дека Стратегијата треба да биде како кровен документ, да даде пресек на постојната состојба, да ги даде насоките за понатамошно унапредување на безбедноста и еден акциски план којшто, за десет години, се надевам, барем ќе го преполови бројот на сообраќајни несреќи што се случуваат во општината, истакна Филип Трајковиќ, меѓународен ревизор за безбедност во сообраќајот и претседател на Здружението на ревизори за безбедност во сообраќајот на Србија.
На втората работна средба беше направена таканаречена SWOT анализа со одредби за посакувана состојба во сообраќајот и предлози за работна верзија на проект за динамичниот и стационарниот сообраќај во централното градско подрачје, со предлог за воведување зонско паркирање во Кочани.
Изработката на стратегијата за сообраќај ќе биде финансирана со сопствени буџетски средства на Општина Кочани. По иницијатива на Министерството за траснспорт и врски, а со поддршка од Светската банка, стратегии за сообраќај треба да добијат уште пет општини во државата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
