Започнаа градежните работи за реконструкција и преасфалтирање на патниот правец од Кочани кон туристичко-рекреативниот центар Пониква на Осоговските Планини, за што државата вложува близу 87 милиони денари.
Министерот за транспорт и врски, Горан Сугарески, кој заедно со директорот на Јавното претпријатие за државни патишта, Зоран Китанов и градоначалникот на Кочани, Николчо Илијев го посети градилиштето, рече дека во овој регион се започнати крупни инвестиции во патната инфраструктура.
– Тука сме на Пониква, еден од најатрактивните зимски туристички центри во источна Македонија, покрај она што ќе значи реконструкција на овој пат, се работи сериозно на развој на туризмот. Нашите очекувања се дека за неколку месеци овој патен правец ќе биде целосно реконструиран, односно саниран, така што сите граѓани коишто ја посетуваат Пониква и со делот на хотелско сместување и во делот на нивните викендички, ќе можат по безбеден пат тоа да го прават. Сакам да потенцирам дека Владата на Република Македонија, преку Министерството, преку Јавното претпријатие за државни патишта ќе инвестира околу 60 милиони евра во делот на Кочани и кочанскиот регион, се однесува се разбор ана она што се работ на експресниот пат Штип – Кочани, ќе се реконструира обиколницата околу Кочани, патот на кој сме денеска тука, така што она што ние како Влада, како Јавно претпријатие за државни патишта беше ветено ќе биде во целост исполнето од наша страна, рече Горан Сугарески, министер за транспорт и врски.
Реконструкцијата на коловозот, чија вкупна должина е околу 22 километри, е започната од правец на Пониква, каде што оштетувањата беа најголеми.
– Патот, којшто на барање на Општината и на луѓето кои гравитираат кон овој регион, а изграден пред некои 35-40 години, заборавен од времето, ние во најбрз можен рок го тендериравме, отпочната е изгрдабата, рехабилитацијата во должина од 10 километри, широчина од 6 метри и истиот треба, согласно временските услови колку што дозволуваат, така да може да биде завршен. Ова не е динствено нешто, од понеделник започнува другиот пат Тркање – Пишица, кој опфаќа исто така во општина Кочани, да не го повторувам експресниот пат којшто се гради од Штип кон Кочани, а во меѓувреме се завршува еластичната ограда, се друго е рехабилитирано на патот од Кочани – Македонска Каменица до Делчево, рече Зоран Китанов, директор на Јавното прептријатие за државни патишта.
Градоначалникот на Кочани, Илијев рече дека рехабилитацијата на патот, заедно со проширувањето на паркинг просторот на Пониква, ќе помогне во реализирањето на плановите на Општината за унапредување и развој на планинскиот туризам.
– Навистина ова е еден прав чекор за развојот на Пониква и на Осоговието, навистина без пристапен пат ова немаше да биде можно, и ова овозможува Пониква и Осоговието продолжат да се развиваат во правец којшто ние веќе одамна го имаме замислено и зацртано во нашите долгорочни планови, рече Николчо Илијев, градоначалник на Општина Кочани.
Министерот Сугарески додаде дека во текот на наредната недела се очекува да започне распределбата на 43 станови за граѓаните од социјално ранливите категории во новоизградената зграда во Кочани.
Т. Ајтовски
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
