На Гинеколошко-акушерското одделение при Општата болница со проширена дејност во Кочани вчера попладне е извршено првото породување во 2024 година, а се родило женско бебе.
Со помош од специјалистот по гинекологија Илчо Атанасовски и акушерскиот тим од Болницата, Дивна Илиева и Даниела Поп Ѓорѓиева, новороденчето на свет го донесе 29-годишната Емилија Постолова од виничкото село Пекљани, на која ова ѝ е трета рожба.
-Породувањето помина нормално и спонтано, без проблеми, бебето е со телесна тежина од 3,3 килограми и должина од 50 сантиметри. Мајката имаше индуцирана преносена бременост од неколку денови, но породувањето беше со уреден тек и во моментот се чувствува одлично. Инаку, во периодот од една година и два месеца имам извршено 50 породувања, а само во 2023 година вкупно 35. Да споменам дека 2022 година ја завршивме со 97 породувања. Очекуваме во болницата да дојде и засилување од Скопје, што ќе претставува изненадување, затоа што ќе се работат и операции. Причина за намалениот број породувања се миграциите, односно иселувањето, поради што секаде во државата има помалку породувања, а освен тоа сега пациентките имаат и приватно осигурување во фирмите и избираат да се породуваат во приватни клиники, истакна гинекологот Атанасовски.
Од Општата болница нагласија дека поради недостигот од медицински кадар минатата година имало помал број породувања, а родилките се испраќани во други здравствени установи.
-Нешто повеќе од една година работи само еден специјалист, а во меѓувреме на специјализација имаме уште три лекари кои очекуваме да се вратат до крајот на оваа година. Со тоа се надеваме дека ќе го вратиме претходниот тренд со поголем број породувања, располагаме и со потребна опрема, односно ехо апарат, како и близначко ЦТГ, а лекарот е ангажиран и во Мој термин во амбуланта, истакна Душанка Горгиева Трпевски, директорка на Општата болница во Кочани.
Делегацијата од Општина Кочани, предводена од градоначалникот Љупчо Папазов денеска ги посети мајката и новороденчето, при што им посака добро здравје и им врачи пригодни подароци.
-Раѓањето на малата Бојана нека биде првиот знак за подобрување на лошиот демографски тренд и во нашата општина и во државата, во очекување дека ќе имаме повеќе новороденчиња. Упатувм благодарност до персоналот на Општата болница за грижата околу мајката и бебето, а на новороденчето му посакувам среќно детство, добро здравје и безгрижни денови во животот, истакна Папазов.
Првиот жител на општина Кочани во 2024 година е малиот Јаков Постолов, кој се роди на 1 јануари на една од приватните клиники во Скопје.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
