– Комуналните претпријатија од општините Виница, Зрновци и Чешиново-Облешево кои собраниот отпад го исфрлаат на депонијата во Кочани, во иднина на кочанското комунално претпријатие ќе му плаќаат по 220 денари за кубен метар.
Висината на надоместокот денеска ја договорија градоначалниците од четирите општини во регионот, при што потпишаа и меѓусебен договор. Со тоа треба да се надмине проблемот околу обезбедувањето финансиски средства за третман и уредување на просторот на депонијата кај селото Бели.
Според договорот Општина Кочани, преку КЈП „Водовод“, ќе презема активности за управување со депонијата, согласно членот 28 од Законот за управување со отпадот, на начин што нема да се дозволи расфрлање на отпадот. Количините на депонираниот отпад ќе се утврдуваат на дневна основа на самата депонија, според носивоста на возилата. Средствата треба да се уплатат во рок од 15 дена од денот на приемот на извештаите на сметката на комуналното претпријатие, кое пак ќе изготвува месечен извештај што ќе го доставува до општините потписнички на договорот.
-Од општина Зрновци ќе се депонира најмала количина отпад, односно на неделно ниво има во просек по околу пет кубни метри. Треба да се има предвид дека на теренот на нашата општина при самото собирање и складирање на отпадот се прави селекција на пластика и хартија, а резултат на тоа се помалите количини отпад. Наша обврска, со потпишувањето на договорот, е надоместокот за исфрлање на отпадот навремено да го плаќање, истакна Борчо Коцев, градоначалник на Општина Зрновци.
-На територијата на општина Виница просечно дневно се собираат по околу 25 кубни метри отпад, што значи дека на месечно ниво на депонијата кај Кочани се исфрлаат по околу 620 метри кубни. Овој износ е релативен и зависи од повеќе фактори, односно од сезоната, динамиката на собирање и слично, истакна Миле Петков, градоначалник на Виница.
Обврска на комуналното претпријатие „Водовод“ редовно да го собира отпадот и да го расчистува просторот во депонијата, со што ќе се спречи негово расфрлање во околината и ќе обезбеди одржување на јавната чистота. Исто така, обврска на Општина Кочани ќе биде обезбедување на 24-часовна чуварска служба на депонијата. Доколку во меѓувреме произлезат прашања коишто не се предвидени со потпишаниот договор, тие дополнително ќе се уредуваат со анекс.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
