По повод Меѓународниот ден на жената – 8 Март, во Виница беше отворена уникатната изложба на стари предмети насловена „Спомени на едно време“.
Настанот, кој привлече голем интерес кај локалната јавност, беше организиран од страна на Активот на жени при Здружението на пензионери – Виница, во соработка со Домот на културата „Тошо Арсов“.
Поставените експонати претставуваат скапоцен дел од македонското културно наследство, а некои од нив се внимателно сочувани повеќе од век и половина. Изложбата нуди автентичен приказ на животот и традицијата од минатото, преку предмети кои сведочат за едно поинакво време.
Посетителите имаат можност да видат разновидни експонати, меѓу кои и предмети од домаќинството и покуќнина, вредни домашни ракотворби, карактеристична староградска облека, музички инструменти, украсни елементи и стари фотографии.
Свеченото отворање на изложбата беше збогатено и со пригодна културно-уметничка програма, во чии рамки настапи женската пејачка група при Здружението на пензионери, придонесувајќи за празничната атмосфера со изведба на традиционални песни.
Оваа поставка не е само потсетување на минатото, туку и значаен чин на зачувување на колективната меморија и почит кон трудот на генерациите пред нас.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
