Со татнежот на моторите, во рамки на активноста „Дедо Мраз на мотор“, денеска членовите на мото клубот „Стронг Рајдерс“ од Кочани стигнаа во дворот на ОУ „Малина Попиванова“ за да им поделат новогодишни пакетчиња на сите ученици од прво до петто одделение.
Пакетчињата се обезбедни со донации, а во акцијата учествуваа сите моторџии чија главна цел беше да им ги разубават претстојните празници на децата и на необичен начин да предизвикаат радост и насмевка на нивните лица. Идејата беше целосно успешна и сите ученици добија новогодишен подарок, за што од училиштето упатија благодарност до Мото клубот и до донаторите.
-Беше договорено да ги изненадиме децата и малце на поинаков начин да ја почувствуваат новогодишната атмосфера. Во училиштето имаме околу 260 ученици од прво до пето одделение и сите добија пакетчиња, истакна директорот на ОУ „Малина Попиванова“, Благој Петров.
Во донирањето на пакетчињата се вклучија Општина Кочани и книжарницата „Рики Јуниор“, а членовите на „Стронг Рајдерс“ најавија дека обезбедиле уште 1.500 пакетчиња за сите дечиња од Кочани и ќе им бидат поделени в недела во Паркот на Револуцијата.
Од ОУ „Малина Попиванова“ истакнаа дека освен изненадувањето за учениците со новогодишните пакетчиња, реализирани се и неколку активности во училишната зграда за подобрување на условите за настава и работа.
-Веќе е завршено реновирањето на училишната спортска сала, со комплетно стругање, лакирање и промена на паркетот каде што беше оштетен. Таа е ставена во функција и со тоа ќе имаме подобри услови за спортските настани. Исто така, во училиштето го опремивме кабинетот по информатика, каде се набавени 15 нови десктоп компјутери заедно со сервер, комплетна мрежна опрема за поврзување. Во ходникот видовте и нови столчиња, а тоа е деп од активностите за комплетно реновирање на целата канцеларија за наставниците и за стручните служби, ќе се обноват подот и вратите, и се надевам дека со почетокот на второто полугодие тие ќе дојдат во нови простории, додаде Петров.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
