Пред поголем број граѓани и роднини на семејството Попиванови, денеска во библиотеката „Искра“ во Кочани беше промовирана книгата „Прилози кон животот и дејноста на Малина Попиванова” од авторите Георги Ајановски и Доне Донев.
Се работи за научно-истражувачки труд во кој подетално се опишани животот и активностите на истакнатата македонска револуционерка Малина Попиванова, позната во предвоеното комунистичко движење како Елена Галкина Краснаја. Таа и целото нејзино семејство се само дел од плејадата македонски национални дејци со потекло од Кочани коишто својата младост и своите животи ги посветиле и ги жртвувале за слободата на својот народ.
Промотор на трудот беше професорката Виолета Ачкоска, која нагласи дека авторите како низ филмско сценарио презентираат слики и искажувања за чудните и потресни животни патеки на семејството Попиванови од Кочани.
-Во центарот на вниманието е трагичната судбина на Малина Попиванова Краснаја или Елена Николаевна Галкина, многу малку обработувана личност во македонската историографија. Трагајќи низ сувопарните историски факти и документи, датуми и случувања, собирајќи зрно по зрно од штурите сеќавања и искази на сведоците, авторите ја доловиле човечката димензија, судбината на поединецот одредена од дадените околности и политичките пресврти на епохата. Тоа е потресна борбена драма на семејството Попиванови кое живеело во едно сосема неизвесно и бурно време и кое на својата кожа ги почувствувало неговите неверојатно променливи плими и осеки. Судбините им се испреплетени, секоја трагична на свој начин. Впрочем, такво било и времето, мачно, тешко за нивната Македонија, раскината на балканската крстосница, претешко за македонскиот народ изложен на сурова асимилација во четири различни држави. За комунистичка и национална дејност следувал најсуров прогон, а токму тоа на својата кожа го почувствувале и Стефан Попиванов и неговите деца Цеко и Малина како декларирани Македонци, револуционери и комунисти, истакна Ачкоска.
Поради здравствени причини еден од авторите на книгата – Георги Ајановски не присуствуваше на промоцијата, но испрати писмен допис што беше презентиран пред присутните.
-Сведок сум дека и покрај различните историски интерпретации и присутни поделби во нашето општество, градот Кочани не само што не подлегна на сите тие политикантски манипулации, туку покажа доследност и принципиелност да не се откажува или дистанцира од националниот и антифашистичкиот придонес на своите сограѓани во остварување на Гоцевите Илинденски идеали. Публицистичкиот труд на господинот Доне Донев, дополнет со моите новинарски истражувања во поранешниот Советски Сојуз, е драгоцен сублимат за сѐ она што македонската историографија досега го има утврдено за семејството Попиванови, истакнува меѓу другото авторот Ајановски.
Коавторот на книгата Доне Донев изнесе краток приказ за идејата да работи на делото со кое дава свој придонес за историографијата на Кочани и личностите што учествувале во неа.
-За Малина слушнав за првпат 1980 година од познатиот режисер Саша Маркус со кој се спријателив по мојата премиера на монодрамата „Јас сакам да станам поет“, посветена на Ацо Караманов, младиот македонски поет загинат во НОВ. Маркус беше радосен што мене, од Кочани ми ја соопштува меѓу првите веста дека заедно со Кузман Георгиевски ќе публикува книга за Малина Попиванова. Тогаш, во младешката занес, не бев ни свесен за каква големина се работи, во домот на Саша ги разгледував материјалите за кои тој со восхит и нескриена радост зборуваше како за најголемо богатство. Не знаев за колкав грандиозен лик се работеше, за лик којшто се борел за правото и правдата на работникот и работничката класа и која во секоја прилика и на секое место гласно изговарала дека е Македонка, родена во Кочани, истакна Донев.
Извадоци од делото на Ајановски и Донев читаше актерот Страшко Милошевски, а по промоцијата примероци од книгата им беа поделени на сите библиотеки во основните училишта во Кочани.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
