Единаесет години поминаа од почетокот на работењето на компанијата „Амфенол Технолоџи Македонија“, што во Кочани дојде како браунфилд инвестиција на познатиот американски холдинг. Оттогаш таа бележи постојан раст и развој и ги исполни, па дури и ги натфрли најавените и очекувани параметри, и во поглед на обемот на производство и на бројот на вработени.
По повод 11. роденден, што ќе биде одбележан идниот викенд, ќе има повеќе активности, што беа презентирани на прес-конференција.
-Во средината на октомври 2013 година почнаа првите активности и веќе 11 години имаме успешно работење. И оваа година обезбедивме доста средства за донации за нашиот партнер Општа болница од Кочани, со која имаме одлична соработка, како и за општините кои што гравитираат и со кои соработуваме, не само Кочани, бидејќи имаме вработени и од Пробиштип, Македонска Каменица, Берово, Виница, Зрновци, Чешиново-Облешево. За сите нив имаме предвидено донации и поддршка, и се надевам дека со тоа само ќе го зголемиме задоволството и на локалната заедница и на нашите вработени, бидејќи тие ја чинат локалната заедница, 3.200 вработени од овој регион не се малку и се важна бројка. Сметам дека со тоа ќе успееме да се оддолжиме колку-толку на локалната заедница, истакна Сашко Наков, директор на „Амфенол Технолоџи Македонија“.
Во компанијата очекуваат растот и развојот да продолжат и во наредниот период, а со тоа и поддршката на општините во регионот.
-Што се однесува до иднината мислам дека сега имаме доволно обем за девет деловни единици, десеттата ја подготвуваме, се надевам дека од јануари ќе ја почнеме. Планот за наредната година е проширување со уште една зграда во автомобилскиот дел, бидејќи имавме доста инвестиции во неавтомобилскиот сектор, како што беа кабинети за реституција на енергија, кабли за медицинска намена, така што имавме повеќе разновидност и ја продолживме таа диверзификација на бизнисот на „Амфенол Технолоџи Македонија“ за да можеме со сите предизвици коишто перманентно ги имаме, да го задржиме и осигураме растот, додаде Наков.
Во рамки на својата општествена одговорност, компанијата обезбеди повеќе донации за институциите и општините од целиот регион.
-На 19 октомври, сабота, „Амфенол Технолоџи Македонија“ ќе ја одбележи единаесетгодишнината од работењето и одлучивме најголем дел од средствата коишто се наменети за роденденот да одат за донации. Вредна донација ќе добие кочанската Општа болница, каде целосно е опремен кабинет со медицинска опрема и сè што е потребно за интервенции. Со тоа во иднина, сите коишто имаат потреба, нема да патуваат во клиниките во Скопје или другите градови, туку овие зафати ќе се извршуваат во кочанската болница. Исто така, дониравме и во детските градинки во Чешиново-Облешево и Зрновци. Со оглед што имаме голем број вработени од целиот регион, „Амфенол“ како донација обезбеди поставување автобуски постојки што ќе можат да ги користат граѓаните на Пробиштип, Македонска Каменица, Виница и Берово, а донација е предвидена и за Доброволното противпожарно друштво во Кочани, истакна Валентина Андовска од „Амфенол Технолоџи Македонија“.
Во рамки на одбележувањето на роденденот, идниот викенд е планирана свечена програма со забавно-музички дел, што ќе се одржи во кругот на компанијата.
-На 18 октомвеи, во петок, на спортското игралиште во ОУ „Св. Кирил и Методиј“ ќе се одржи турнир во мал фудбал којшто е веќе традиционален и на кој учествуваат екипи од сите производни единици на „Амфенол“. Тоа ќе биде во 19 часот и ќе претходи на прославата на роденденот. В сабота, во 13 часот на платото пред компанијата на новата локација ќе имаме еден свечен, но и фамилијарен и забавен ден. Нашите вработени ќе можат да присуствуваат со своите деца и подготвуваме еден интересен забавен град, а на оваа дневна свеченост е предвидено доделување признанија, награди, благодарници и гравирани рачни часовници за нашите колеги коишто се вработени пет години. 193 лица ќе ги добијат овие награди. Вечерната забава е од 19 часот на истата локација и на оваа свеченост ќе бидат прогласени најдобрите вработени кои ќе добијат вредносни ваучери, а 81 работник кои се со 10 години стаж ќе добијат јубилејни награди. Имаме и музички гостин – Антoниа Гиговска, и навистина имаме причина да ја одбележуваме оваа единаесетгодишнина со 3.200 вработени, од кои 500 се на возраст до 25 години, што особено радува и убедени сме дека тој тренд ќе продолжи, додаде Андовска.
Во „Амфенол Технолоџи Македонија“ не го кријат задоволството од постигнувањата што компанијата ги направи во текот на изминатата деценија, а плановите се таа да продолжи да се развива и да остане меѓу најважните стопански субјекти во државата и пошироко.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
