Општина Кочани ги почна подготвителните активности за реализација на проектот за изградба на нов сообраќаен мост на Кочанска Река, јужно од постојниот железнички мост, што ќе ги поврзува улиците „Вера Которка“ и „Лазар Андонов“. Веќе е објавен јавниот повик за избор на проектантска фирма која ќе ја изработи потребната техничка документација, а за што од општинскиот буџет е предвидено да се инвестираат околу 1,2 милиони денари.
Според насоките во спецификацијата на повикот, треба да се проектира мост со должина од околу 30 метри, што ќе има носивост и за тешки товарни возила. Заради специфичноста на теренот, односно постојниот колектор за фекална канализација во речното корито, нема можност за изведба на големи темелни стопи, па мостот треба да се потпира на т.н. колови, вкопани на поголема длабочина, за да се избегне нивно поткопување од поголема вода.
Со планираните параметри во проектот треба да се исполнат сите одредби во постојните правилници и технички прописи за стабилност, безбедност и сигурност на објектот, а за што ќе биде потребно да се обезбедат и мислења од овластени институции како што се Институтот за земјотресно инженерство или Институтот за сеизмички отпорни градби и климатски промени.
При изработка на проектната документација треба да се земат предвид сите услови на терен, за што од давателот на услугата се бара самостојно да ги направи потребните испитувања, анализи и увиди, како и да предвиди дислокација на постојните подземни инсталации за струја, вода, комуникација и слично.
Рокот за пријавување на заинтересираните проектантски фирми на јавниот повик трае до 22 мај, а по изборот на најповолната понуда ќе биде склучен договор. Обврска на избраниот давател на услугата ќе биде документацијата да ја комплетира во рок од 10 месеци.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
