Голем број верници присуствуваа на денешното осветување на православниот христијански храм „Света Недела“ во Соколарци.
Изградбата на црковниот објект траеше подолг период и се наоѓа во непосредна близина на манастирот „Св. Петка“. Ктитори се тројцата браќа Динови чии корени се од Соколарци и го реализирале аманетот што им го оставил нивниот татко.
-Почнавме пред петнаесетина години и еве денеска, конечно се заврши. Владиката Иларион го освети и го предаваме на Македонската православна црква. Аманетот беше од татко ми, пред 15 години ни кажа да го направиме овој храм. Ние сме тројца браќа и шурата, требаше прво тој да го изгради до карабина, а ние потоа да го доградиме целосно. Ова останува на црквата и на граѓаните, денеска е осветувањето, а на 20 јули е денот на Света Недела, истакна Марјан Динов, ктитор на храмот.
На чинот на осветувањето чиноначалствуваше митрополитот брегалнички Иларион во сослужение на свештеници од соколарската парохија и од кочанското архиерејско намесништво.
-Уште еднаш им благодарам на ктиторите бидејќи од љубов го изградија овој храм, посветувајќи го на Света Недела, на великомаченица, посакувајќи многу здравје и благослов Божји. Оваа светителка и сите свети да ги чуваат нивните семејства и дај Боже и понатаму да се градат храмови и да се осветуваат, но не само вакви храмови од тули и цигли, туку и сите ние да постануваме жив храм, преку кој што ќе се осветуваме, спасуваме како образ Божји, како млади богови по благодат коишто сме повикани да се спасиме и како што велат Отците на црквата – Бог постана човек, човекот да постане Бог, истакна митрополитот Иларион.
По осветувањето на храмот беше приредена причест за верниците, а потоа беше послужен празничен ручек што го подготвија вредните домаќинки од Соколарци.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
