Наместо вообичаениот „Марш за ангелите“ Здружението „16 март 2025 – Кочани“ организираше мирен собир на кој им беше оддадена тивка и достоинствена почит на загинатите во пожарот во Кран Монтана, Швајцарија.
На собирот што почна во 16:40 часот во Паркот на Револуцијата во Кочани, беа запалени свеќи во форма на срце, а во тишина беше изразено сочувство и солидарност со семејствата на настраданите во швајцарскиот зимски туристички центар.
-Ве молиме за тишина. Вечерва сме собрани симболично поради 40-те животи што згаснаа во пожарот во Кран-Монтана, Швајцарија. Ова е тивка и достоинствена почит. Ве молиме да останеме во тишина за време на целиот настан, рече Габриела Наунова, чија ќерка Надица настрада во „Пулс“.
Помалата сестра на настраданата Надица, Ангела симболично остави мече на плочникот меѓу запалените свеќи и порача: „Децата не смеат да умираат поради туѓа неодговорност никогаш“.
Од собирот беше упатено јавно писмо до семејствата на загинатите во угостителскиот објект во Кран Монтана во кое беше изразено сочувство и болка за жртвите.
– Вечерва зборувам од местото каде што мајчиното срце се крши и продолжува да чука само затоа што мора. Зборувам со глас што не е само мој — глас научен во ноќта кога чекањето престана да има смисла, кога надежта застана пред вратата и никогаш не влезе. Знам што значи да чекаш чекор што нема да се врати, да гледаш во вратата и да знаеш дека таа вечер времето се скрши и повеќе не продолжи исто. Знам како тишината тежи повеќе од било кој крик. Како болката не вреска, туку тивко те распарчува ден по ден.Вечерва вашите деца ги спомнуваме без глас. Со пламен што одбива да згасне. Со срца што се скршени, но сè уште умеат да сакаат. Од една мајка до друга — ве држиме за раце. Не за да ве утешиме, зашто утеха нема. Туку за да не бидете сами во болката што нема име. Не сте сами. И никогаш нема да бидете. Од Кочани, град што ги закопа своите соништа заедно со своите деца, ви испраќаме прегратка што не лечи — но сведочи. Нека почиваат во мир. Во светлина. И во љубов што не згаснува, рече Ирена Минова, чија ќерка Драгана е меѓу жртвите во „Пулс“.
Истото писмо беше прочитано и на француски јазик, а потоа кон небото беа пуштени четириесетина бели балони во знак на солидарност. На собирот присуствуваа претставници од швајцарската амбасада во Македонија, како и од Центарот за психосоцијална и кризна акција – Малинска.
Во знак на почит кон жртвите граѓаните кои присуствуваа на мирниот собир запалија свеќи.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
