Нема позитивни промени во состојбата со запалената градска депонија кај селото Бели. Во изминатото деноноќие таа повторно се разгоре и последиците од тоа ги чувствуваат сите граѓани. Чадот што го загадува воздухот и ширењето на силна миризба од изгорени материи, повторно ја прекрија целата котлина, така што и во целосно сончев летен ден, таа изгледа како да е прекриена со магла во зима. Реакциите на граѓаните се оправдани, а фотографиите што ги испраќаат се дополнителна потврда дека потребно е брзо и соодветно дејствување од надлежните.
Најновите снимки покажуваат дека депонијата гори од сите страни, а во понеделникот попладне и во вечерните часови излегуваше црн загушлив чад, од што може да се заклучи дека не биле запалени само органски отпадоци, туку и материи со поинаков хемиски состав.
Податоците од мерната станица во Кочани на Министерството за животна средина покажуваат зголемено присуство РМ2,5 честички од околу 55 микрограми на метар кубен, што е над законски пропишаното ниво. Слична е состојбата и со присуството на азотен диоксид, кај кој нивото во изминатите денови постојано е во горната граница од над 30 микрограми на метар кубен.
Без разлика дали огнот на депонијата е намерно предизвикан од лица кои таму собираат метални отпадоци, пластични шишиња и друг отпад што се користи како секундарна суровина или пак дошло до самозапалување, факт е дека деградирањето на животната средина и лошиот квалитет на амбиенталниот воздух се случува секојдневно. Не треба голема мудрост за да се заклучи дека долгорочните последици од тоа се на штета на сите жители во регионот.
Освен тоа, купиштата ѓубре и понатаму ги дочекуваат посетителите на Пониква, додека поминуваат по регионалниот патен правец кон падините на Осоговските Планини. Најлоша е глетката на влезот и околу контејнерите поставени во непосредна близина на градската депонија. Со тоа полоша реклама за туристичките потенцијали на природниот планински амбиент не може да има.
Најдобро решение веројатно е да се најде друга локација за овие контејнери, што барем би била подалеку од погледите на минувачите. Иако тоа е само маскирање на проблемот, барем срамот од целата состојба ќе биде привидно помал.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
