Родителите на загинатите деца во пожарот во „Пулс“ денеска ја одржаа првата од најавените секојдневни едночасовни блокади на кружниот тек кај двојниот мост во Кочани, во знак на револт поради одолговлекувањето на почетокот на судскиот процес за обвинетите во трагедијата.
Во периодот од 15:15 до 16:15 часот, родителите не дозволија одвивање на сообраќајот на оваа крстосница, а блокадата ја обезбедуваа полициски службеници.
-Немаме никакво соопштение од Кривичниот суд во Скопје, никаква дата, никакво објаснување кога ќе почнат рочиштата и затоа се решивме на овој чекор. Ако не успееме нешто со овие блокади, овде во Кочани, за да добиеме некое термин за рочиштата, блокадите ќе ги продолжиме во Скопје пред Кривичниот суд со порадикални мерки. Ќе се договориме колку време, колку дена ќе траат овде блокадите, за тоа ќе направиме состанок меѓу нас родителите, истакна Светлана Стојанова, чиј син Андреј загина во „Пулс“.
Родителите повторно ги повикаа адвокатите на обвинетите во случајот да не зборуваат во јавноста колкав период ќе трае судењето, што тие го сфаќаат како најава дека не треба да ја очекуваат правдата за своите деца.
-Малку да имаат чувство кон нас родителите, бидејќи излегуваат во медиумите и кажуваат предвреме колку ќе трае ова судење. Малку нека се замислат дека за нас тоа е убиство и да не ни создаваат поголем револт и поголеми стресови. Треба прво да размислат пред нешто да кажат. Апел и до судиите, до Кривичниот суд побрзо да си ја завршат својата работа и да го закажат рочиштето, бидејќи нашето трпение е веќе при крај. Сѐ потешко и потешко ни е секој ден, сѐ повеќе стресови и виктимизација на жртвите. Нашите деца ги убиваат повторно и повторно со тие нивни изјави на обвинети, и на крајот ќе испадне дека ние родителите и нашите деца виновни, додаде Стојанова.
Првиот ден од блокадата на крстосницата на една од главните улици во Кочани помина без инциденти, а сообраќајната полиција ги пренасочуваше возилата по другите сообраќајници во градот.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
