Во вторник во ОУ „Св. Кирил и Методиј“ почнува уписот на учениците со продолжен престој од прво до трето одделение за учебната 2024/25 година. Приоритет ќе имаат деца на самохрани родители, доколку старателот има специфична болест и ако двата родитела се вработени.
Потребни документи кои треба да се достават до образовната установа се: Барање од родителот, потврда од работодавачот за последна исплатена нето плата на двајцата роделите, копија од трансакциска сметка на подносителот, како и изајва за вистинитост на сите податоци.
Посебни одредби за поднесување има за лицата кои не се во работен однос, за регистрираните индивидуални земјоделци, доколку е дете на починат родител, на разведени родители или пак пензионер и лице кое боледува од специфична болест.
-Од минатата година во нашето училиште функционира паралелка со продолжен престој на учениците. Таа беше формирана откако беа создадени услови за училница по нормативи на Министерството за образование и наука. И оваа година паралелката ќе продолжи со својата работа, максимумот ќе биде 30 ученици, но поради голмиот одѕив на родителите во лани, оваа година создадовме посебни критериуми кои се објавени на фејсбук страницата на училиштето и на медиумскиот клуб „КиМ Ко – инфо“. Во комисијата ќе бидат пет члена. Ќе учествуваат претставници од Советот на родители, одделенски наставници и од стручниот актив. Во план сме за следната година да направиме уште една ваква паралелка која што ќе брои 30 ученици, но откако ќе создадеме услови за специјализирана училница, според насоките на Министерството за образование и наука, истакна Жаклина Јорданова, в.д. директорка на ОУ „Св. Кирил и Методиј“.
Потребната документација заинтересираните родители треба да ја поднесат кај училишниот психолог во периодот од 13 до 23 август. Комисијата за прием ќе одлучува по барањата од 26 до 28 овој месец, по што ќе биде објавена и прелиминарната листа на примени ученици.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
