Голем број проекти од различни области ќе бидат реализирани во населените места во општина Зрновци во наредниот четиригодишен мандат, со што ќе продолжиме со унапредувањето на квалитетот за живеење на граѓаните и за целокупниот развој, истакна на прес конференција Борчо Коцев, кандидат за градоначалник од ВМРО-ДПМНЕ.
-Изминатиот период, заедно со граѓаните на општина Зрновци, институциите, министерствата и во разговор со експерти од различни области изготвивме сеопфатна програма којашто опфаќа и нуди решенија и проекти од секоја сфера. Истата е поделена во неколку поглавја, односно модерна патна инфраструктура поделена на три сегменти – изградба и реконструкција на регионални патни правци, изградба и реконструкција на локални патни правци, како и локални улици. Во делот на регионалните патни правци предвидуваме изградба и реконструкција на регионален пат правец општина Зрновци – општина Кочани и општина Зрновци – општина Виница. Во делот на локалните патни правци можам да го издвојам локалниот патен правец „Вински пат“ којшто ќе претставува алка за раст и развој во делот на агротуризмот, како и нови винови насади и плантажи. Во делот на урбанистичкиот одржлив развој предвидуваме разработка на урбанистички блокови во трите населени места, како и парцелација на градежно земјиште што ќе овозможи услови за вложување на приватниот сектор во растење и развивање и реализација на проекти, истакна Коцев.
Заедно со членовите на ВМРО-ДПМНЕ кои се на кандидатската листа за советници во Советот на Општината, Коцев нагласи дека во предизборната програма се предвидени проекти за младите, за развој на спортот, како и за создавање услови за стопански инвестиции на приватниот сектор.
-Оваа програма којашто заедно со кандидатите за советници од ВМРО-ДПМНЕ ќе ја доставиме до секој еден жител, до секое домаќинство, се разликува од претходните затоа што во самата програма се предвидени Топ 5 проекти коишто буквално ќе ја прераснат општина Зрновци во економски моќна и ресурсен центар за туризам и здрав живот. Овде можам да ги набројам комплетна документација, од основен проект до урбанистички проект, за изградба на брана, акумулација на Зрновска Река, односно ново срце во Источна Македонија. Втор проект којшто го предвидувме е изградба на младински кампус – Екокампус во Видовиште на местото на старото училиште. Потоа изградба на четири бушотини за вода во трите населени места, со што значително ќе го подобриме квалитетот на водата. Предвидуваме изградба на индустриска зона во село Мородис на површина од 60 илјади квадратни метри, каде што ќе создадеме услови за изградба на преработувачки капацитети. Воедно, со вонурбанистички планови, предвидуваме на две локации во село Зрновци изградба на две индустриски зони со површина од 50 и 60 илјади квадратни метри, истакна Коцев.
Коцев додаде дека во изминатите четири години реализирани се повеќе проекти со единствена цел Зрновци да стане развиена општина за идните генерации.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
