Националната агенција за европски образовни програми и мобилност (НАЕОПМ) денеска од Кочани почна едукативна кампања наменета за сите потенцијални корисници на програмата Еразмус+, за да ги унапреди транспарентноста, конкурентноста и квалитетот на проектите во согласност со европските вредности и практики во образованието.
Директорот на НАЕОПМ, Петар Богојески беше во работна посета на основното училиште „Св. Кирил и Методиј“ во Кочани каде најави серија обуки, информативни сесии и теренски активности за зголемување на учеството на основните и средни училишта, како и на други јавни институции во програмата Еразмус+.
-Симболично, оваа иницијатива започнува од Кочани кое неодамна беше погодено од огромна трагедија на национално ниво, а ја почнуваме со конкретна институционална поддршка од страна на Агенцијата за иднината на младите, како и во развојот на локалните образовни установи. Средствата што беа предвидени за репрезентативни трошоци, вклучувајќи храна и пијалаци, во месец април ќе бидат пренаменети за набавка на училишен прибор за дел од учениците во едно од општинските училишта. Оваа практика ќе стане редовна и месечниот буџет за репрезентативни трошоци ќе се користи за директна поддршка на ученици и образовни институции низ целата земја, истакна Богојески.
Богојески истакна дека недоволен број училишта до сега биле вклучени со проекти од програмата Еразмус+, односно се работи за еден затворен круг на учесници, поради што голем дел од средствата остануваат неискористени или не стигнуваат до вистинското место. Тоа е една од причините за почеток на кампањата со која треба да се зајакне капацитетот за меѓународна соработка, за унапредување на образовните практики и отворање нови можности за учениците, наставниците и младите во целата држава.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
