Општина Кочани беше домаќин на првата регионална работилница во рамки на проектот „Поддршка на имплементацијата на регионалните системи за управување со отпад во Источниот и Североисточниот регион“, чија цел е да се воспостави соработка меѓу клучните локални субјекти кои се одговорни за животната средина.
За реализација на проектот се обезбедени 7,5 милиони евра од фондовите на ЕУ, договорен орган од македонска страна е Министерството за финансии, а главни корисници се Министерството за животна средина и општините од двата плански региона.
-Се работи за продолжување на веќе почнатата поддршка за воспоставување регионален систем за управување со отпадот, во согласност со „Аки комуните“ законодавството на ЕУ. Главна цел е општините да добијат поддршка при воспоставувањето на регионалниот систем за управување со отпад, за што веќе ги усвоија документите, а сега треба да почне практичното спроведување на овој план. Клучни активности се подигање на јавната свест, јавноста да се информира за системот, а ќе се ажурираат локалните системи за управување со отпадот затоа што законодавството на национално ниво веќе е ажурирано. Ќе има и конкретни активности за јакнење на капацитетите на општините и на јавните комунални претпријатија, за да им се помогне во воспоставувањето и во функционирањето на заедничкото претпријатие за управување со отпад, коешто веќе е основано и сега треба да стане функционално, истакна Теофанис Лолос, директор на регионалниот проект за управување со отпадот.
Во рамки на активностите на терен, согласно законодавството на ЕУ, ќе се делува проактивно во насока на минимизирање на отпадот и тој да се рециклира пред воопшто да стане отпад.
Проектот ќе се реализира во период од две години, а за што поефикасно управување ќе бидат опфатени сите видови цврст отпад во општините. Тоа се однесува на отпадот од домаќинствата, но и на комерцијалниот и индустриски отпад. Посебно внимание ќе добие и управувањето со специфични видови, како што е отпадот од пакување, електронскиот отпад, батерии, акумулатори и слични материјали за кои веќе има активности за рециклирање во двата региона.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
