Граѓаните, граѓанските активисти и здруженија од Кочани од денеска имаат простор во рамки на Центарот за солидарност „Сакам живот во Кочани“, во кој ќе можат заеднички да се координираат и дејствуваат.
Просторот на улицата „Маршал Тито“, во некогашната продавница за чевли „Борово“, симболично треба да ги поврзе сите кои сакаат да дадат свој придонес за иднината на градот. На отворањето беше речено дека во колективната меморија има врежано и добри и лоши периоди, но никогаш не се памети слична трагедија како што се случи во март годинава.
Носител на идејата за отворање на Центарот е граѓанското здружение „Воскресение 2017“ од Кочани, а главен мотив е да се покаже солидарност, да им се подаде рака на сите засегнати и да се унапредува соживотот во иднина.
-Кочани има над 5.000 деца под 18 години на кои треба да им креираме услови за живот, кои на кои треба да им јја подобриме иднината и сите да добијат надеж дека живот во Кочани е можен, и не само можен, туку и пожелен. Ова е просторија во која треба да се состануваат граѓаните на општина Кочани, невладините организации со една цел – заеднички да креираме стратегија која во иднина, со подадена рака едни кон други, ќе донесе подобар живот за сите во Кочани. Затоа и мотото „Сакам живот во Кочани“ не е смислено туку-така, туку тоа е еден мотив кој нѐ води напред и кој ќе нѐ води во следните години, сѐ додека не дојдеме во ситуација секој граѓани да посака да живее во општина Кочани. Мораме да ја запреме миграцијата која се најавува, не само во странство, туку и внатрешно, и Кочани да го направиме атрактивно место за живеење. Тоа е возможно само доколку секој од нас се придвижи во тој правец и во областа во која работи, како да се подобри себеси, така да ги мотивира и другите околу него да направат условите за животот да бидат подобри, истакна Зоран Тодоров од Центарот за солидарност „Сакам живот во Кочани“.
На отворањето на Центарот беше упатен јавен повик до сите граѓани, до невладините и други организации кои сакаат да помогнат да се вклучат во активностите, кои за почеток ќе бидат поврзани со трагичниот пожар, но подоцна ќе се развиваат и во други области.
-Секако дека приоритет ќе биде помошта за настраданите, директно погодените во несреќата, но тоа беше само вовед. Да кажам дека ние во општина Кочани имаме и граѓани, кои не се повредени, но сепак и за нив треба да криеме подобри услови за живот. Значи, целта нема да биде само за повредените од несреќата од 16. март, туку ќе бидат општо сите граѓани на општина Кочани опфатени со некоја стратегија која во иднина ќе ја креираме, додаде Тодоров.
Во активностите на Центарот беше најавено дека ќе се вклучат и партнери од земјата, но и од странство, односно мултинационални компании. Практично со заеднички идеи и искуства треба да се изготви стратегија, со вклучување на Општината, но и на централната власт и со сите чинители на општествените дејности во државата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
