Третата панел дискусија во рамки на проектот „Граѓаните и медиумите го ‘озеленуваат’ Поглавјето 27“ се одржа денеска во Виница. Се разговараше за регионалното справување со цврстиот отпад и предизвиците со кои се соочуваат и граѓаните и институциите на овој план.
Организатор на настанот беше граѓанското здружение „Медиа плус“ од Штип во соработка со радиото Канал 77 и Медиа4ЕУ, а присуствуваа претставници од невладиниот сектор, како и од комуналните претпријатија и од општините Виница, Кочани, Чешиново-Облешево и Зрновци.
-Идејата е да ги чуеме пред сѐ граѓаните, колку тие се запознаени се Поглавјето 27, кои се обврските на општините во делот на регионалната депонија којашто треба да се отвори во Светиниколско, колку се подготвени општините за истата депонија, до каде е постапката со претоварните станици и како се справуваат. Можевме да заклучиме дека не постои некоја голема координација, има недостиг од кадар во помалите општини, постои недостаток и во делот на контејнери, возила и сето она што е потребно за да се справуваат со отпадот. Можеме да кажеме дека е ниска и свеста кај граѓаните за селектирање на отпадот, бидејќи максимум 60% од отпадот треба да завршува на депониите. Очигледно е дека мора да продолжиме да работиме и да побараме како граѓански сектор институциите да бидат потранспарентни и поефикасни, затоа што справувањето со отпадот не е само поглавје за кое преговараме, туку тоа е основна потреба на граѓанинот и од тоа зависи квалитетот на неговиот живот и здравјето на неговото семејство, истакна Зоран Биковски, координатор на панел дискусијата.
Од средбата ќе бидат подготвени заклучоци што ќе им бидат доставени на носителите на одлуките за да има поефикасни институции и потранспарентно работење.
Поглавјето 27 е дел од преговарачката рамка за пристапување на Македонија кон ЕУ, а содржи преку 200 правни акти кои опфаќаат хоризонтална легислатива, квалитет на водата и воздухот, управување со отпадот, заштитата на природата, контрола на индустриското загадување и управувањето со ризик, хемикалии и генетски модифицирани организми (ГМО), бучава и шумарство.
Проектот „Граѓаните и медиумите го ‘озеленуваат‘ Поглавјето 27″ е финансиран од ЕУ, спроведуван од „Евротинк“ во партнерство со Европската асоцијација за локална демократија – АЛДА и Балканскиот институт за регионална соработка – БИРЦ.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
