Вкупно 112 интервенции за гаснење пожари имала Територијалната противпожарна единица од Виница во текот на 2024 година, што е за една четвртина повеќе во споредба со претходниот едногодишен период.
Најголем број од интервенциите, вкупно 83, биле кај пожари на отворен простор, при што била опожарена површина од 167 хектари, што е за над 50 отсто повеќе споредено со 2023 година. Во 13 случаи се интервенирало кај запалени објекти, 4 излегувања на терен биле за гаснење пожари кај моторни возила, а останатите пет се друг вид интервенции. Причина за избувнување на огнената стихија кај 101 интервенција е човечко невнимание, кај 7 интервенции имало спој на електричната инсталација и неисправност на електрични броила, а два пати се запалиле оџаци.
Од ТППЕ – Виница информираат дека лани од пожарите е предизвикана материјална штета што се проценува на вкупен износ од над 620 илјади денари, што е далеку пониска вредност во споредба со 2023 година.
Во текот на минатата година спроведени се пет превентивни активности за заштита од пожари, односно предавања во училиштата и фирмите, како и заеднички практични вежби во стопанските субјекти.
Покрај гаснењето пожари, пожарникарите од Виница имале и 14 други интервенции, од кои 7 биле кај сообраќајни несреќи во кои во два одделни случаја имало по едно загинато лице.
Освен со интервенции на територијата на општината, виничките пожарникари во текот на минатата година во седум случаи со опрема и кадар им помагале и на своите колеги од Кочани, Берово и Свети Николе.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
